新界區樓價今年發威，地產代理嘅新界東分區樓價指數上個星期終於去到136.02點，首次超越港島分區指數。睇番新界東樓價指數入面25個成分屋苑之中，依家有14個實用呎價已經升破1萬元，比去年底多咗一倍，其中有4個屋苑升幅超過20%，升得最勁係上水御皇庭同皇府山，分別升咗28%同24.2%。

新界東分區樓價指數上星期首次超越港島區分區指數。（資料圖片）

新界東部分CCL成分屋苑實用呎價變化

中原地產研究部高級聯席董事黃良昇同劉Sir講，喺用家主導之下，新界區樓價今年升幅跑贏大市，新界東CCL_Mass指數比去年底升咗約13.8%。

御皇庭皇府山標青

由數據睇到，樓價升勢最大是北區周邊嘅屋苑，當中御皇庭同皇府山呎價依家去到10,046元同9,267元，比去年底急升28%及24.2%，而同區上水中心都升咗7.5%，明顯跑贏市中心屋苑。

北區其他屋苑好以粉嶺牽晴間同花都廣場，都分別升咗20.1%同19.1%，依家實用呎價約9,552元同8,927元。

沙田方面，傳統大型屋苑明顯跑出，好似沙田第一城同沙田中心，樓價比去年底升咗23.3%及18.2%，但係其他屋苑就落後大市，河畔花園、銀禧花園同帝堡城，分別只係升咗11.8%、7.1%及6%。

睇番啲數據，去年底新界東只有7個屋苑的實用呎價超過萬元，但到依家已經有14個，多咗足足有一倍，新增嘅屋苑包括御皇庭、大埔太湖花園、大埔中心、馬鞍山雅典居、馬鞍山中心同海典灣，以及火炭駿景園。

牽晴間365萬即扑錘

細價樓買少見少，買家入市決定都快咗。美聯陳梓彬表示，牽晴間9座低層D室，建築/實用面積約522/385方呎，兩房間隔，買家見個單位間隔四正，所以睇完之後，不作他想，即以約365萬元買入，建築/實用呎價約6,992/9,481元。

利嘉閣楊震霆話，馬鞍山新港城今個月錄到約4宗成交，其中J座低層4室，建築/實用面積約697/518方呎，以600萬元賣出，建築/實用呎價8,608/11,583元。屋苑依家有150個賣盤，入場價390萬元。