尋日隻粵海制革（01058）狂飆15.3%，以接近全日高位0.75元收市，市值突破4億元，仲係細細粒，加上母公司係粵海控股，具國企改革概念，有機獲注資或引入民資，甚至成個粵海系重組，當殼炒又得，多重概念！

粵海制革上半年收入增長22.2%至5.5億元，純利倒退9.3%至369萬元，原因係人仔貶值抵銷了牛面革價量齊升的利好因素。期內牛面革產量2,006萬平方呎，上升5.7%；銷量2,168萬平方呎，上升18.5%；銷售額4.8億元，上升23.7%。內地推動環保而限制皮革加工業，今年鞋面皮革市場仍然低迷，公司積極研發新產品，同時亦加大直銷力度，雖然表現唔及去年全年純利激增四倍至573萬元，不過亦未至於難睇，只係可能需要及早諗諗計轉型，始終主業盈利能力實在偏弱。

走勢上，股價自八月起沿住50日線上升，期間喺十月觸及低位0.5元後回勇，尋日喺成交急增下，踩油收復10日線及20日線0.66至0.67元的匯集區域，短線應該有力再升多浸，阻力先睇一年高位0.86元，支持喺0.66元。