港股尋日繼續上升，但係波幅就好細，全日僅170點，恒指收市升63點，報23,808點，國企指數則升36點，以10,652點收市。交投依然暢旺，全日主板成交金額有959億元。滬港通下周一啟動，市場觀望反應，大戶亦不敢輕舉妄動，相信在今周餘下時間，恒指會維持在窄幅水平徘徊。

聯想當前要務，是盡快將摩托羅拉與本身手機業整合，達致轉虧為盈。(資料圖片)

內地股市昨日一度呈強，滬綜指突破2,500點關，惟高位無以為繼，最後倒跌4點，以2,469點收市。銀行股表現突出，但近期熱炒的「一帶一路」板塊回軟。尋日恒指雖然向上，但市場氣氛只屬一般，全日主板上升股票只有612隻，反而下跌的仲多，有677隻。

中廣核美亞續持有

阿莊近日買入的中廣核美亞（01811），買完之後走勢一路都好對辦，仲創埋2.86元上市新高，但近幾個交易日開始掉頭向下，尋日再跌2.64%，穿埋條10日線，去返阿莊買入價附近。呢幾日市場資金流晒去AH差價股、券商股，形成其他股份乏人問津。

睇番中廣核美亞，最近三個交易日跌落嚟，成交不升反跌，反映實際沽壓唔大，而且公司基本因素唔錯，所以阿莊會繼續持有。

聯想集團（00992）截至九月底止中期業績雖略勝預期，但由於第二季度營業額按年只增長7%至105億美元，為年半以來最慢增速，故引發股價急挫，一度跌近10元關，低見10.12元，之後連升兩日，昨日反彈3.23%，以10.86元收市。

事實上，市場過去對聯想的業績表現都比較敏感，些微差池都會為股價帶來波動。而今次聯想的營業額增長未如理想，主要受智能手機銷售拖累，但集團未來主攻智能手機發展方針未改，更會利用聯想品牌拓展印度、拉丁美洲等新興市場，至於摩托羅拉則專攻歐美等成熟市場。

目前，聯想正透過現有的銷售、供應鏈平台，推動摩托羅拉銷售，降低開支，希望能盡快將摩托羅拉轉虧為盈，只要完成整合，相信長遠對提升聯想手機業務有正面的效益。

由於市場普遍預期，聯想未來兩季的業績將持續低迷，料會阻礙股價升勢，十日及二十日線匯聚於11.1元水平，相信有一定阻力，現水平追入值博率不高。