上星期港股跌足五日，連同上周五的99點跌幅，恒指全個星期跌447點或者1.86%，跌幅唔算大。但看華爾街兩大指數，道指及標普500指數雙雙改寫歷史新高，港股獨弱情況相當明顯。

恆指期貨走勢

港股在整個亞洲市場中，上周排倒數第二，礙於上周五收市後，先有美國就業數據，今早輪到中國多項重要數據登場，即市炒家無興趣博過市，反彈乏力現象亦可理解。

上周五港股中段都有一段小插曲，投行消息話滬港通可能有着落，刺激恒指由午市前的23,450點左右，直奔到午後的23,831點，之後又倒跌收場。是否警鐘誤鳴也好，觀乎港交所（00388）及券商股大升之後，未有同大市一樣倒跌收場，傳聞不似空穴來風也。

即月期指日市23,504點，較合理值低26點，成交7.7萬張。由十月二十九日期指轉倉高峰期至上周四為止，即月未平倉合約維持在10.2萬至10.5萬張之間上落，變動唔大，但對比九、十月同期，卻明顯減少兩萬至3萬張之多，反映期指大戶其實亦有睇唔通後市，實行少做少錯。由較低的未平倉數字及變動，筆者確信短期處於上落市，機會要比營造單邊市為大。