九月以8.5元上市嘅神州租車（00699），行業具獨特性，掛牌初段極之搶手，曾經挾到去12.18元；可惜之後腳軟，尋日喺兩間大行不約而同唱好下，即市雖一度見番11蚊關，但收市竟倒跌0.1%，報10.76元，似乎10日線10.82元阻力頗大，都係睇定啲先。

神州租車是內地最大的租車公司，市佔（31%）排第一位，拋離排第二位的8.2%。一一至一三年分別錄得虧損1.5億元（人民幣．下同）、1.3億元及2.2億元，主要係因為公司以價格戰加快擴大規模同提升市場份額。不過，今年上半年錄得純利2.1億元，較去年同期僅賺165萬元明顯有改善，毛利率亦升3.7個百分點至31.1%，原因係去年停運車隊產生成本，同埋今年逐步增加基本租金。單睇過去三年數字，行業頗有燒錢感覺，車輛折舊、服務運營、行政開支等都非同小可。

另外，瑞信同大摩分別畀佢目標價12.3元同11.2元，前者話該股可以受惠行業增長、經營桿杆，而後者就睇好自駕市場、限購政策令入場門檻高咗，但資本開支需求極大，加息將加重債務負擔。