尋日朝早，滙豐編制的中國十月製造業PMI初值回升至50.4，創三個月新高，亦是連續五個月處於50之上，加埋早幾日祖國官方公布的第三季GDP有7.3%增長，稍為好過市場預期的7.2%，以及近期人行透過SLF定向放水，中國經濟「硬着陸」的風險經已大幅減低，不少分析更認為GDP在第三季見底，第四季開始輕微回升的機會頗大。

如行業無其他補貼政策出台，TCL多媒體中短期仍難見起色。（資料圖片）

太陽日誌

TCL多媒體往績（港元）

數據反映內地經濟比市場預期樂觀，但A股卻插足三日，尋日滬綜指再跌24點，收報2,302點。睇番七月指數由大約2,050點起步，一直無掂過條50日線，尋日收市指數卻同50日線2,293點差唔夠10日點，似乎有些少中期轉勢迹象。

A股弱勢，一來因為唔少內地投資者本來都憧憬，中央會在第四季出手，由微刺激轉到強刺激措施，包括人行減息，但第三季數據無疑令阿爺重手救市的幻想空間大減。其次，滬港通十月通車已成泡影，亦多少對A股有負面影響。

醒目資金沽A股

留意恒指AH差價指數，七月底時顯示A股較H股最多折讓達11.3%，但隨住十月預期的通車日子逼近，過去兩個月A股明顯跑贏歐美港股，本月三日A股一度較H股有1.7%溢價，炒兩市差價收窄提早完成，大孖沙要諗到底滬港通通車之後，會出現AH股一齊升，抑或一齊跌的可能。

睇番近期國企指數由九月高位11,440點至今累積近千點跌幅，在風險同回報考量下，醒目錢唔多唔少都傾向趁高位在A股市場酌量減磅。

內地股市有轉弱迹象，同本地中資股形成惡性循環，昨日中移（00941）被基金狂質，即使內銀股仲頂得住，恒指仲係要跌70點，收報23,333點。個市拍晒烏蠅，主板成交縮到得505億，創近三個月新低。

尋日中移佔咗恒指55點跌幅，賓架線消息話同第三季營運數據無大關係，反而係因為中移年初至今累升近一成，同期恒指幾乎是原地踏步，有對沖基金拆倉，掟一啲今年跑贏大市的重磅股份換貨所致。

聯通可吼位上車

尋日話過要昅住中國聯通（00762）業績，股價績前被質低3.5%，收報10.9元，但收市後份成績相當亮麗，純利38.74億元（人民幣．下同），按年升26.7%，比尋日高盛估的30.32億元或者街外大行平均預測的32.2億元都要高，按季則升14.3%。

國資委要求三大電訊營運商唔好再貼錢搶客，話要削減手機補貼，聯通都夠晒聽話，首三季補貼額39.1億元，按年跌32.7%，減番首兩季的33.32億元補貼，即係第三季只有5.78億元，按年大減64%。

首三季賺106億元，已經達大行預測全年賺127.9億元的83%，今日被大行重估機會極高，如果未上車的，10日線11.37元（港元．下同）樓下都可以諗得過。

至於另一業績股TCL多媒體（01070）首三季賺2.28億元，按年升1.04倍，單計第三季則賺5,868萬元，去年同期則為虧損1.42億；首三季營業額236億元，跌15.4%。

基於內地市場需求疲弱以及屏幕供應短缺，TCL將全年LCD電視機銷售量目標由1,800萬台降低至1,700萬台。以現價2.62元計，跟去年第二季中央終止節能家電補貼前高位7.28元相比，剩番三分之一，估計全年賺2.7億至2.93億元，一四年PE12至13倍，假如中央無其他補貼政策幫助家電行業，TCL中短期有食之無味，棄之可惜的感覺。