九月初推介過嘅中國中藥（00570），股價一度高見4.28元，即使之後畀國藥基金掟咗3.3億元貨，九月尾連跌三個交易日，但好快就挾番上嚟，尋日仲要再創一年高位4.42元，升6%至4.35元，牛叉初現，另唔排除異動同潛在收購有關，短炒睇住4.8元先，支持位喺3.9元。

其實中國中藥前身叫「盈天醫藥」，去年十一月先至改名，用新名旨在反映全新企業形象同身份。公司原本主攻呼吸及鼻部用藥、心腦血管藥及風濕骨傷藥，去年獲國藥集團入主後，成功買起同濟堂，以加快擴大中藥版圖至骨科中藥。同濟堂出產傳統中藥的歷史逾400年，代表作有已被納入國家醫保名錄嘅「鼻炎康片」、「玉屏風顆粒」等，另擁有一批傳統中藥秘方如「保濟丸」、「大活絡丸」、「源吉林甘和茶」等。

睇番成績表，中藥繼去年錄得純利增長17.8%，至1.9億元人仔後，今年中期多賺1.9倍至1.8億元人仔，毛利率亦由57.8%升至60.9%，原因係內地各省開始藥品招標工作，同埋合併同濟堂財務報表及銷售團隊。