樓價繼續升，再有新界區細價屋苑呎價過萬。屯門市廣場一個低層兩房單位，成交實用呎價10,361元，係該屋苑呎價首次升穿1萬元。另外，荃灣二線細價屋苑荃景花園，有高層單位以410萬元賣咗，實用呎價再次穿1萬元。

二手樓價續升，細價樓的實用呎價頻過萬元關。（資料圖片）

近日部分屋苑二手成交

中原冼詠恩同劉Sir講，呢個屯門市廣場新高價單位，係2座低層G室兩房單位，實用面積327方呎，交吉有樓睇，稍為減價1.2萬賣咗338.8萬元，實用呎價約10,361元，創屋苑呎價新高。

佢同事都話，同區冠峰園3座高層A室，放咗盤一日即賣390萬元，兩房單位從未試過賣呢個價，實用呎價6,724元。

美聯梁仲維話，荃景花園呎價又有單位過萬，2座高層B室賣咗410萬元，實用呎價10,049元，高市價8%。

代理又話，大埔翠屏花園C座低層戶業主以300萬元沽貨，實用呎價11,152元，創屋苑新高。

銀禧撻訂貨再貴賣

代理話，將軍澳區今個月有156宗租，但只有88宗係二手買賣。中原伍錦基話，將軍澳廣場1座高層E室，賣咗520萬元，實用呎價12,560元係屋苑第三高。利嘉閣郭建民又話，火炭銀禧花園7座高層D室，上月賣過490萬元被人撻咗，近排再賣過500萬元。

除咗私樓，中原羅彩娥仲話，青衣夾屋宏福花園3座中層兩戶單位，一放盤傾平15萬元，即賣545萬元，實用呎價9,909元創屋苑新高。

康怡轉旺連開5單

二手樓交投多番，中原楊文傑話，上半個月無成交嘅鰂魚涌康怡花園，近五日連錄5宗成交，屋苑R座高層3室，減50萬賣620萬元。

美聯林海成話，荔枝角美孚新邨今個月有成20宗買賣，恒柏道3號低層連租約單位，收租客就用483萬元買咗。