上周四推介過嘅華彩控股（01371），前日即市高見0.86元，尋日就停牌話待發潛在投資消息，留意到另一隻又係世盃過後無乜聲氣嘅智美集團（01661），尋日亦見異動，逆市急升6.9%至5.25元，成功突破保力加通道頂部5.19元，可以候低喺中軸4.77元附近上車，阻力睇6蚊。

智美上半年收入增長21.6%至3.2億元人仔，純利增長43.1%至1億元人仔，原因係智美體育的收入及利潤增加。期內智美賽事運營收入激增30倍，毛利佔比由0.6%升至31.8%，可以睇到體育業務處於高增長期。除積極打造線上線下營銷平台外，公司已將智美節目同智美品牌，合併咗做智美影視節目分部，令電視節目製作、發行及廣告服務一體化，只係暫時仍然面對過渡性影響。

另一方面，智美早前先後與安徽省、江蘇省、遼寧省及重慶市幾間社會體育指導/管理中心訂立戰略合作協議，獨家運營全部社會體育比賽，期限去到一八年底，涉及每年群眾體育賽事300場，參與人數超過500萬人次，公司未來增長有保證。