雖然近幾個月市況好咗，但豪宅市場似乎仍未完全擺脫劣勢，劉Sir聽市場人士講，早前以2,400多萬元賣出嘅南區淺水灣道37號一個細單位，最近單交易告吹，業主重新將單位再放盤，係咩原因令到交易告吹就唔知，但係可以話係二手豪宅喺「佔中」後首宗同類個案。部分豪宅屋苑仍然出現蝕讓，好似何文田半山壹號高層戶以3,200萬元登記賣咗，個價比○八年做價低出超過360萬元。

南區淺水灣道37號一個細單位最近錄得交易告吹。（資料圖片）

劉Sir聽市場人士講，淺水灣道37號近一個月連錄好幾宗成交，不過其中一個原本以2,400多萬元售出實用面積約848方呎細單位，據悉交易告吹，業主將單位重新以近2,600萬元放售。

計一計數，「佔中」事件發生之後，市場已經錄到多宗撻訂個案，不過大部分係新盤單位，合共有約6宗同類個案。

二手豪宅近期仍然有蝕讓情況，好似半山壹號半山徑38號高層戶最近以3,200萬元登記賣出，相比起○八年購入價仍然低約逾360萬元或10%，以建築面積約2,313方呎計，建築呎價約1.38萬元。

禮頓山低估價轉手

而跑馬地禮頓山6座低層B室亦以4,000萬元登記沽咗，相比一○年購入價貶值500萬元或11%。不過，據個別銀行嘅網上估價，呢個單位市值約5,600萬元，今次個價咁低，相信未必係正常成交。

相比之下，佔中運動對新界區樓市影響較為輕微，世紀21灝天地產盧嘉麟話，大埔滌濤山近排錄到3宗成交，其中一幢雙號屋以3,938萬元賣出，以實用面積2,216方呎計，實用呎價約1.78萬元。

另外，中原何兆棠話表示，今年第三季山頂南區共錄得34宗豪宅買賣，比第二季微升6.25%，其中分層戶佔25宗，洋房佔8宗，屋地就只得1宗；成交總值約31.81億元，成交金額跌14.98億或32%。

今季山頂南區成交集中喺淺水灣道前段一線物業，好似陽明山莊就錄到6宗買賣成交，而平均實用呎價亦按季上升17.3%至25,186元。

展望第四季成交宗數按季會升20%，租賃成交宗數及金額就趨向平穩。