內地煤企經營環境嚴峻，除發改委早前公布「關於遏制煤礦超能力生產規範企業生產行為的通知」（包括不安全生產、無證開採及未批先建）外，近日財政部亦都出招打救，帶旺中煤能源（01898）四連升，現已收復10日、20日同50日線，尋日收報4.83元，升幅1.8%，14日RSI（61）仲有上升動力，即管睇吓今轉可唔可以脫離八月延伸至今的下降軌，博試五十二周高位5.26元，支持就喺250日線4.43元。

中煤上半年業績全跌，收入及純利分別倒退12.3%及75.8%，至354.3億元及7.8億元人仔，而毛利率亦跌5.7個百分點至12.2%。在環保壓力、進口煤衝擊等因素下，煤炭市場產能過剩加劇，令到庫存維持高位、價格持續下跌，故佢下調今年原煤計劃產量目標一成，即係比起去年實際產量減少半成，策略審慎。同時，自十二月一日起，雖然內地煤炭資源稅將由從量變成從價計徵，不過有指中煤亦已上調每噸售價10至15元不等，以消化資源稅增加的成本。

另外，自十月十五日起，內地會對無煙煤、煤焦煤、其他煙煤、其他煤及煤球，恢復實施關稅3至6%；配合九月發改委公布「商品煤質量管理暫行辦法」，唔符合要求嘅不得進口，相信有助抑制進口煤。