自「佔中」後，本港零售及飲食等行業生意大受打擊，市場上除了出現業主叫租減價個案，更有租戶支持唔住，要搵人將個舖頂租。有代理同劉SIR講，依家市場上已經有超過10宗放頂租個案，主要集中喺旺角亞皆老街、彌敦道同砵蘭街，以及銅鑼灣軒尼詩道等，佢仲話「佔中」令到代理生意額大跌，相信本月按月會大跌七成，今季核心區舖租更加會跌達兩成。

旺角零售生意近日受時局影響，有商舖租戶要求頂租。（資料圖片）

中原潘志明（右）稱，本月工商舖暫錄不足二十宗成交。

佔中以來舖位最新市況

中原商舖部董事黃偉基同劉SIR講，依家喺各個零售核心區總共錄到超過10宗放頂租個案，主要集中喺亞皆老街、彌敦道、軒尼詩道同灣仔皇后大道東等地，不少喺樓上舖。而區內舖位亦出現叫租下調20%或以上個案。

代理生意月內少七成

黃董話，其中銅鑼灣怡和街一個舖位叫租由55萬減至38萬元，減幅約31%。佢又話，月初果陣原本有8至10宗幾乎簽約的租務個案，但因為佔中而擱置咗，至今都未有進展，十月至今舖位部生意額按月下跌約60至70%。佢預期，今季核心區舖價按季下跌約10%，舖租就下跌10至20%。

該行商舖部陳國坤話受「佔中」影響，今個月初開始市場出現唔少舖位放頂租個案，其中砵蘭街有兩間食肆正搵緊人頂租，面積分別約莫1,000方呎，意向頂租租金分別為8萬同12萬元，同舊租金一樣，租期分別尚餘半年及數個月。

中原（工商舖）董事總經理潘志明話，佔中對寫字樓及工廈市場未有構成太大影響，預計今季寫字樓同工廈售價及租金會按季上升5%至8%。

海富中心意向價1.5億

另市傳由紀惠集團湯文亮或有關人士持有嘅上環中遠大廈中層全層，獲買家以約3.75億元洽購至尾聲。韋堅信代理標售金鐘海富中心1座高層相連單位，面積約7,150方呎，意向價約1.5億元，截標日期下月二十日。港置許諾謙表示，荃灣市中心思源樓地下4及5號舖，面積共約2,300方呎，意向價約1.7億元。