近月中航系、軍工概念股不時爆上，好似上周五擬發債嘅中航國際（00161），喺魚缸大挫之際，竟成為跌市奇葩，即市創下6.48元的一年新高，收報6.46元，升幅6.7%。

暴炒妹年前曾經推介嘅中航科工（02357）同廣船國際（00317），前者於6蚊邊整固，後者因重組而停牌，睇嚟相關消息陸續有來。

中航國際業務瓣數多，包括製造及銷售液晶顯示器、印刷電路板及手錶、地產開發、國際工程、貿易及物流服務等，其最終控股公司為中航工業集團，呢期中航工業分拆整合事項傳得熱哄哄，料將涉及航空發動機業務，連帶佢喺本港上市嘅多間公司股價亦波動。睇番成績表，雖然中航國際上半年少賺24.5%至1.6億元人仔，不過電子高科技業務轉型升級成效顯著，分部盈利貢獻激增。

近日旗下天馬公司擬向武漢天馬增資，投資第六代LTPS TFT-LCD及CF彩色濾光片生產線，該中小尺寸液晶顯示屏及模組應用於中高端智能手機、差異化平板電腦等，將推動電子高科技業務增長。