今個星期有兩幅土地先後截標，打頭陣係今日截標嘅港鐵（00066）大圍站上蓋發展項目，呢次截標中小型財團相信唔使再望門興嘆，事關幅地補地價金額比兩年前首次推出時減近兩成，仲破天荒畀投標財團選擇要唔要商場，扣埋補貼入場費少過30億元，相信點都好過首次收到嘅3份標書。東涌第53a區酒店地緊接喺星期五截標，估值最高22.6億元。

大圍站上蓋項目（箭嘴示）今截標，預計標書數目將較兩年前錄得為多。（資料圖片）

張聖典指，項目可選擇只發展住宅部分，增添靈活性。（資料圖片）

兩幅截標地皮基本資料

劉Sir話畀大家知，上述大圍站項目在兩年前試過因補價過高流標收場，今次捲土重來，有個好開始。早前收到23份意向書，而為咗增加批地勝算，招標條款會大幅調整，其中補地價金額就由首次推出時嘅127億元，調減約18.5%至大約103.56億元。

項目商場部分提供A、B餐，可以選擇自行持有或者比返港鐵，而港鐵會提供75億元補貼畀返唔要商場部分嘅財團，即係入場門檻變相減至僅約28.56億元，每方呎補價只係約1,400元，令到唔少財團都有能力投標。

新世界傾向合資競投

另外，部分兩年前未有投標嘅發展商，都放風話今次可能有意入標，好似新世界發展（00017）早排就話傾向以合資方式入標。

而會德豐地產都覺得條款比起首次推出時更為吸引，都有興趣競投咁話。

理想城市張聖典認為，大圍站項目規模大，不過發展商今次可選擇淨係發展住宅部分，相對增加競投嘅靈活性。除咗主要大型發展商之外，唔少中型財團都有入標機會，反應預期應該會比起第一次推出時好。

劉Sir知道，大圍站項目總樓面超過270萬方呎，住宅樓面佔大約205萬方呎，將會提供約2,900個單位。

東涌酒店地估達22億

至於東涌第53a區酒店地就會喺今個星期五截標，項目總樓面約61萬方呎，韋堅信測量師行林晉超認為，東涌係新開發區，相信發展商會積極部署投標，預期會有一定參與度。

市場預計地皮每方呎樓面地價約莫2,700至3,700元，估值約莫16.5億至22.6億元。