新界樓價低水，早就吸引投資者，當屯門南延線建議公布之後，最近連投資者都轉移陣地。上兩個月已經用咗1,230萬元連掃4伙天水圍嘉湖山莊嘅買家，本月繼續以新高價喺屯門掃貨，最近用破頂價400萬元買入屯門邁亞美海灣兩房戶，加加埋埋已經買咗逾2,000萬元貨等收租。

屯門南延線建議公布後，吸引投資客入市該區。（資料圖片）

嘉湖山莊

投資者掃入單位一覽

祥益蕭嘉偉同劉Sir傾開，話前排有個投資客，轉吼嘉湖山莊單位收租，貪屋苑樓價細，第時發展後升值潛力好。

新屯中實呎八千五

個投資客喺六至八月已四度出手，用樓價約290萬至350萬元買咗4間，夾埋成1,230萬貨，準備收住租等升值。點知屯門南延線建議一出，就即刻去屯門搵樓。

阿蕭又話，佢都好識貨，去到屯門專揀靚單位，响月初先用388萬元買入新屯門中心10座一個高層海景單位，實用呎價8,527元，呎價係屋苑新高。

個投資客啱啱又再用400萬元呢個兩房新高價，連租約買埋同區邁亞美海灣6座高層D室，以實用面積515方呎計，呎價去到7,767元，批單位全部收住租先。

除咗投資者，美聯陳智生都話，有換樓客睇好鐵路前景，即用376.8萬元買入元朗尚城3座高層D室，實用呎價約7,096元，個單位三年幾只係升咗6%。

近排細價同單幢樓主宰二手市。中原指，大埔麗湖閣高層A室以406萬元賣出，實用呎價約10,074元，創同類新高；美聯話，荃灣翠豐臺1座有個連天台戶賣成530萬元，實用呎價約1.21萬元再創新高，一個多月來破幾次頂。

龍暉閣反價8萬沽

去返市區，世紀21富山講，黃大仙龍暉閣高層開放式單位，反價8萬元，仍然有買家以248萬元承接，實用呎價1.13萬元。富誠地產話，鑽石山帝峰豪苑今年開頭單，有高層兩房戶以580萬元破頂價賣出，實用呎價1.22萬元。

代理又話，九龍上車指標大角咀港灣豪庭8座高層單位，賣到534.3萬元，實用呎價1.44萬元，創咗同類新高。