滬港通十月開通，阿爺講明要大鑼大鼓燒炮仗，做到好好睇睇。中港兩地股市，預咗跌得咁上下出嚟托吓，較意外是，人行揀聯儲局議息結果公布前出手，向五大行提供流動性，令連跌八日的港股，出現技術反彈。

恒指期貨走勢

昨日恒指裂口開出24,380點之後，全日在24,339至24,470之間上落，最後恒指收報24,376點，主板成交769億元，即月期指日市收24,375點，成交4.7萬張。

大市反彈，但50日線24,468點的阻力始終陰魂不散，內銀股受放水消息帶動，國指表現較佳，升175點報10,893點，即市高位10,949點，回補部分周一在10,924至10,967點之間遺下的下跌裂口。

執筆時未知耶倫會後聲明點向市場詮釋加息將至的事實，從美股調整後有回勇迹象，港股由25,362高位計最多跌1,245點，按過往的短線調整，這幅度其實已頗充分。

綜觀中國對下半年經濟增長口硬心軟，落藥的舉措已經畫公仔畫出腸，恒指跌近兩萬四邊，可能已完成或者接近中短期後抽的底部，假如今日指數重返50日線，會先以三分之一注碼再開好倉。