上星期，中國國家總理李克強出席夏季達沃斯論壇，勸說大家對中國GDP唔好太着緊，官方說法係高一點、低一點都可以接受，話口未完，人行就向五大行提供常設借貸便利（SLF），規模共5,000億元（人民幣．下同），每次期限三個月，意味釋放5,000億元到銀行系統，投行計過數，大約等於降低存款準備金率50個基點。

港美息口若回升，對存款基礎夠大的本地銀行有利。（資料圖片）

太陽日誌

券商預測銀行股一五年業績（港元）

果頭叫大家忍吓經濟陣痛，轉個頭又彈弓手去開水喉，一班等阿爺出手救命的股市玩家彷如絕處逢生，連跌八日的港股反彈240點，收24,376點，國指升175點收10,893點，滬綜指升12點收2,307點。

可能小弟杞人憂天，恒指由25,362見頂，撻到落星期二低位24,117點，但出到放水呢招，都只係升番兩百多點，睇落唔算強。當然，基金經理亦可能係想等埋聯儲局主席耶倫尋晚議息後的演說，看會否暗示提早加息至行動都未定。

博彩股逆市下跌

講返尋日個市，受惠SLF，中（03988）農（01288）工（01398）建（00939）四大行升幅介乎1.1至1.9%，香港的個人遊旅客消費轉弱唔係新聞，隨着內地反貪腐的情況持續，大行對疏打埠的博彩業務表現，有打折再打折的情況，尋日美銀美林將一五年博彩收入增長預測由9.4%降至8.1%，兩隻博彩股逆市下挫，金沙（01928）跌3.8%，銀娛（00027）跌2.5%，在五十隻藍籌中表現倒數第一、二。

阿里巴巴招股定價在即，騰訊（00700）終於企番穩，升2.4%，收報124港元，阿里巴巴啱啱嚟香港路演，主理人馬雲仲話定價高低唔緊要，最緊要小股東開心，轉頭見市場反應好，將招股價上限推到68美元，果然同馬雲提出「顧客第一、僱員第二、股東最尾」的企業文化好鬼配合！以27倍PE，比騰訊、百度的35至40倍低，以街外預估全年盈利增長35至40%計，看來是預留一定水位畀認購者有得走盞。

阿里唔益本地客

問幾個私人銀行朋友，佢哋話今次保薦行留咗唔少貨畀美國投資者以及一些大型科技基金，本地客就即使經佢哋以house account入飛，分到的機會都唔大，要有心理準備得0.1至0.2%分配率得啖笑，照咁睇阿里巴巴即使掛牌表現再勁，都益唔到本地股市玩家，短炒不如博番隻騰訊好過。

執筆時未知耶倫會點樣以鴿派的說話，演繹明年加息時間可能比市場預期的第三、四季來得更早的傾向，有趣係美國第一次加息，斷估都係一年半載之內，殺到埋身，但一些高息投資產品，好似完全無受影響，好似上星期滙控（00005）發coco bond（或然可換股債券），最初話6.5至6.7厘，見最終超購n咁多倍，埋單以6.375厘定價，結果一開出見5.9厘，hot到離晒譜。以往息升，最最敏感係呢類高息債，依家市場似乎唔多理傳統想法，總之有yield就追。

查實如果港美息口回升，一些存款基礎夠大的本地銀行有着數，好似恒生（00011）及中銀香港（02388），假設美國每加息0.25厘，每股盈利可多3.7%與2.9%，依家兩股一五年預計股息率約4.36及4.81厘，雖然話業績爆發力唔係好勁，但點計都抵博過隨時因加息加得比預期快，賺息蝕價的coco bond。