「價細」上車單位搶手，恒地（00012）等發展嘅馬鞍山迎海第3期迎海．星灣御，剛攞到預售文件就隨即部署搶灘開盤。該項目兩房或以下細單位佔逾七成，最快今個星期尾至下周初開價，或月底至下月初開售，示範單位或今個星期開放。新世界（00017）同樣主打細單位嘅西環EIGHT SOUTH LANE，昨連沽兩伙，全盤95伙已被掃清。

恒地林達民表示，馬鞍山迎海．星灣御每座頂層都有兩個天際屋。

各區快開售新盤一覽

恒地營業（一）部總經理林達民同劉Sir講，迎海．星灣御嘅預售文件已經到手，會盡快派發樓書，最快今個周末至下個星期初開價，有機會月底至下月初開售。

佢又話，個盤售價會參考迎海第1、2期，而1、2期平均實用呎價大約1.1萬到1.2萬元，最近三個月賣出嘅40多伙，平均呎價要成1.25萬至1.26萬元，估計3期個別優質單位售價更可以睇高一線。

SOUTH LANE全數沽清

林達民話，迎海．星灣御雖佔咗71%係兩房半或以下細單位，但項目都提供10伙頂層複式天際屋，每個面積2,742至2,880方呎，間隔都係四房連四套房大則，當中一半仲設有私家天際泳池。

同系嘅北角維峯指定單位新增二按計劃，首三年息口係最優惠利率減2.85厘，今個星期日會推售3伙。

至於受惠西港島綫年底落成刺激，新世界嘅EIGHT SOUTH LANE近期銷情快咗好多，尋日連沽最後兩伙，成個盤95伙已一件不留，套現逾6億元。項目喺最近十七天內速沽51伙，係近排區內首個沽清新盤。

觀月高層賣1499萬

消息透露，信置（00083）觀塘觀月．樺峯尋日賣出高層A室，成交價1,499.52萬元。大埔逸瓏灣II大廈第10座16樓B室，成交價1,687.06萬元，呎價15,212元。

另有本地客前日連購灣仔囍滙第二期兩伙，其中2座中層G室一房複式特色單位，成交價2,117.11萬元；而2座高層行政樓層G室，成交價2,802.6萬元。鰂魚涌MOUNT PARKER RESIDENCES尋日都賣咗9樓E單位，成交價4,292.7萬元。