八號風球高高掛，港股半日市，尋日推介的中冶（01618）曾逆市升13%，收報2.06元，升6.7%，都算係跌市奇葩！

尋日又留意咗隻中芯國際（00981），股價逆市靠穩，收報0.77元，升1.3%。原來繼法巴上周發報告，預計中芯未來兩年業務增長穩健之後，野村啱啱都發報告唱好中芯，仲將佢目標價由0.68元上調至1.1元，現價值博率都唔錯！

中芯屬毫子股，價位合炒家胃口，但其實晒士一啲都唔細，市值成268億元，好似尋日股價波幅雖然唔大，但成交都有1.47億元。近幾年中芯的業務表現反覆中有改善，股價自一二年底低位輾轉回升，今年以來主要波幅在0.6至0.8元水平，現價已升近阻力區，若升軌趨勢持續，按理年內股價可突破五十二周高位0.88元。

早前大唐同中投都認購咗中芯優先股，論股東背景，中芯一啲都唔輸蝕，問題係業務長期缺乏重大突破，在催化劑欠奉下，操作空間有限。

但誠如野村報告提到，嚟緊中芯有新概念，就係現時兩地的半導體股估值相距太遠，當滬港通啟動後，若同胞來港執平貨，中芯有望成焦點。