風暴影響港股得半日市，配合隔晚美國科技股出現技術調整，以及A股創新高後遇阻回落近1.8%，令大孖沙完全失去博反彈的興趣。恒指以貼近全日低位收市，跌220點，收報24,136點。半日市總成交達581億元，可見昨日現貨沽壓唔細，即月期指日市收24,183點，成交3.5萬張。

恒指期貨走勢

港股連跌八日，可是形勢上一如之前所指，聯儲局議息聲明於周四凌晨才有分曉，今日無論做好做淡，都要冒住賭鋪大細風險，唔想為入市而入市，索性等聯儲局會議塵埃落定至諗點做好過。

歐洲方面，蘇格蘭獨立公投成為焦點，匯市反應流於悲觀，英鎊約兩個月時間內由接近1.72插到早幾日1.61樓下，暫時民調顯示，統獨陣營支持率只係五五波。筆者本身對事件發展沒有個人睇法，但留意到英國外圍莊家開出的賠率，維持1賠1.25，蘇獨1賠3，一面倒盤口反映這班真金白銀受注的莊家，幾乎有一致的結論。

股匯市炒家可以睇錯，或純為避險做兩手準備，英國莊家這類專業到極的分析高手，在這類金融事件開盤，過去往績是準到無倫。既然港股得個睇字，筆者反而有興趣賭吓英鎊在1.6算附近反彈。