颱風「海鷗」襲港，但係吹唔散買家嘅熱情，二手成交唔單止增加，嗰價升得仲急。鰂魚涌太古城喺打風時，速錄至少4宗買賣，當中最少有兩宗創新高價。同區康怡花園有兩房單位，喺八號風球下賣咗646萬元，實用呎價逾1.38萬元，都係新高。

南灣御苑一個高層單位沽出，實用呎價創新高。（資料圖片）

鰂魚涌康怡花園有兩房單位，在八號風球下錄得高價成交。（資料圖片）

颱風下部分二手買賣

太古城喺打風下成交仲多，期間至少有4宗。中原張光耀同劉Sir講，屋苑南海閣低層連租約單位，實用面積約552方呎，以822萬元賣出，實用呎價14,891元。美聯吳肇基話，同屋苑另一個海天閣高層單位賣咗1,400萬元，實用呎價17,677元，創埋同類單位新高。

同區康怡花園都錄得高價成交，中原黎國權講，屋苑P座中層11室，打緊「八號波」都賣646萬元，實用呎價13,863元，係同類新高。

南灣御苑2650萬沽

豪宅客都心急入市，劉Sir收到風，打風時南區南灣御苑1座高層C室，實用面積約1,300多方呎，以約2,650萬元賣出，實用呎價超過1.9萬元。

天水圍嘉湖山莊去貨都好快，利嘉閣陳偉立話，有內地客用309萬元買入屋苑麗湖居8座中層E室自用，單是買家印花稅就要畀46萬元。代理話，亦有居港滿七年外籍家庭，一次過用689萬元買兩個嘉湖山莊單位。美聯1都講，同屋苑翠湖居3座有個連天台單位，以411.88萬元沽出，實用呎價7,516元，創同類新高。

居屋海福實呎破萬

睇番房委條數，上個月公、居屋第二市場錄到203宗買賣，比七月少咗23宗，當中5個居屋均價再破頂，另外，鴨脷洲公屋利東邨有個中層單位，成交實用呎價去到5,880元，係第二貴嘅未補價公屋，計埋九月暫時錄到25宗成交，今年有2,129宗第二市場成交，已經多過上年全年水平。

自由市場居屋呎價近期頻破萬元，劉Sir睇番資料，大圍海福花園3座中層C室賣410萬元，實用呎價10,224元，貴絕新界東。富誠地產講，鑽石山宏景花園5座高層J室賣468萬元，屋苑實呎價首次破萬元。