細價股中策集團（00235）喺五月底低見0.148元後反覆回升，尋日狂飆12.5%至0.224元，即市高見0.237元，睇番成交亦都配合，但係隻股好蝦人玩，細細注跟炒吓就算！

由柯清輝擔任主席的中策，現已終止製造及買賣電池產品，轉做買賣金屬、電子產品、放債及證券投資，公司賣咗蝕錢嘅電池業務仲有錢落袋，難怪上月配股（每股0.16元） 但股價都仲咁硬淨，而且多咗彈藥收購。

繼去年虧損縮至1,539萬元後，今年上半年扭虧為盈，錄得純利1.27億元，前年同期則蝕7,683萬元，原因係期內錄得出售附屬股權收益1億元，同埋金融資產公允值收益2,990萬元（去年公允值虧損6,300萬元）。

望吓走勢，雖然股價由今年二月高位0.32元，碌到落五月低位0.148元，唔見咗五成幾，不過依然處於去年七月中旬延伸至今的上升軌，有見佢每次突破後都會回一回，等到回調兩毫子邊收集較值博。至於參考阻力位0.25元，支持位0.2元。