非核心區商廈受到市場追捧，多家發展商亦積極部署喺該區賣樓吸金。尋日億京黎裕宗同劉Sir講，睇好未來九龍東商廈，將會喺明年首季一口氣推出3個觀塘現樓商貿及寫字樓項目，總樓面面積加埋差唔多成90萬方呎，又話意向呎價會介乎10,500至11,000元。

觀塘駿業街商廈項目，樓面面積近36萬方呎。（資料圖片）

億京黎裕宗表示，明年首季推出三項觀塘項目。

億京旗下東九龍項目資料

億京發展項目籌劃經理黎裕宗話，集團旗下有三項東九龍現樓項目，最快於明年首季推出，全屬觀塘區。

駿業街涉近36萬呎

當中包括創業街15至17號及駿業街52至56號商廈項目，同成業街10號商貿項目，總樓面面積加埋約90萬方呎，意向呎價10,500至11,000元。其中樓面面積最大嘅係駿業街項目，約35.9萬方呎。

雖然3個項目同時推出，但黎氏話項目始終有分別，買家自己識揀，不怕「自己打自已」影響銷情。佢又透露畀劉Sir聽，仲有一個同樣位於東九龍嘅新蒲崗五芳街2號寫字樓項目，總樓面面積約31萬方呎，相信喺明年中攞到預售同意書。

該集團旗下九龍灣常悅道嘅恩浩國際中心商廈會重推50個貨尾，意向呎價約9,060元起，入場費約2,050萬元。黎裕宗話依家喺東九龍起樓，建築成本至少要7,000元，入場呎價約9,060元。

中原（工商舖）工商部區域營業董事盧偉德話， 該批餘貨單位入面，6、8及9樓係全層樓面，單位面積由約1,561方呎至全層約12,263方呎。

金鐘匯全層6150萬沽

億京位於沙田石門嘅安群街3號項目，黎氏話目前已完成地基工程，每層面積約1.6萬方呎，料細單位入場費約600萬元。

黎氏又話對集團早前奪得荃灣楊屋道商業及住宅綜合地皮感到意外，由於項目限制興建至少790個單位，預計每個單位面積不會大於530方呎，但就唔會考慮興建超細單位，預計每方呎建築成本約1萬元。

另美聯鍾家強表示，灣仔金鐘匯中心16樓全層以約6,150萬元沽出，呎價約14,967元，創該廈近半年最高成交呎價。