昨日恒指急跌485點,收報24,705點,一來隔晚蘋果iPhone發布會,科技股照例高潮後鳥獸散的傳統,另一方面,面對下周二、三的美國聯儲局會議的不確定性,投資者選擇食胡離場。

若美國真的進入加息周期,滙控與渣打均可受惠。(資料圖片)

綜合大行對滙控之預測(美元)

太陽日誌

睇番上周五美國勞工部公布的八月就業數據,非農職位增長弱過市場預期,但無阻十年美債孳息慢慢回升,與八月低位2.3厘相比,昨日傍晚去到2.51厘的一個月新高,已累積0.21厘升幅,近日債市開始怕耶倫在下周的議息聲明,會刪除維持超低利率「for considerable time」三隻字,為出年開始加息做準備,故在下周議息前,相信基金經理避險減磅在所難免。

先利申,史提芬乃果粉一名,近幾次每次keynote發布會,但凡有直播,都會漏夜守在電腦前面睇到散場,前晚蘋果公司仲破天荒加埋普通話傳譯,舵手Tim Cook有幾重視中國市場已經畫公仔畫到出腸。

iPhone帶挈本地炒家

之不過,之前的iPhone5代及iPad Air,祖國都係首發市場,今次竟然落空,結果三隻電訊股尋日齊齊插水,中移(00941)跌2.5%,收98.7元,中電信(00728)跌3.4%,聯通(00762)跌3.31%。

講到底,近日中電信及中移先後大玩洩密,仲偷步接受預訂,蘋果對住無合約精神的做法,唔嬲有鬼!據知三間公司合共收咗近11萬部手機預訂,預留網頁尋日無端端被消失,此地無銀,臨門撻Q的原因也呼之欲出也!姑勿論如何,就算遲一兩個月開賣,斷估新iPhone在華銷售都唔會差得去邊,但成件事最大得益者,肯定係本地炒家,今個星期五又齊齊玩大抽獎遊戲。

高息企業債受歡迎

依家全世界都有磚頭貴、股票貴(講緊歐美股市)、債券貴的情況(連財政經濟穿晒窿的西班牙,十年債息都落到2.19厘)。掉番轉頭睇,其實都係講緊銀紙唔值錢。話就話美息短期可能進入上升周期,但高息企業債券近期所見,卻係完全無有怕一樣。尋日滙控(00005)發兩隻永續債券,其中二○二四年non call的一隻Baa3級美元計價債,叫6.5至6.75厘,聽講一個上晝經已比預定發行額超購6至7倍,以近排歐洲銀行的永續債發行表現一般而言,市場反應是出奇咁好。

查實如果美國真係進入加息周期,當地資產質素續改善,本地兩間跨國銀行滙控與渣打(02888)相比,前者條件會較為佔優。話就話跨國銀行面對top line營收部分無乜增長空間,以慳皮及唔再畀政府罰錢為首要任務,但睇番滙控今、明兩年的預計股派息率分別有4.9及5.3厘,高於歷史平均股息率一截,如果債價可以繼續維持在現時高位,相信股價可跌水位亦應該唔會太多。