租盤愈嚟愈矜貴，就算公屋、居屋都大把人爭住租。好似大角咀居屋海富苑有迷你單位，實用面積只得約200方呎，月租要成8,500元，實用呎租超過40元，拍得住港島指標藍籌屋苑。買樓收租咁保值，唔怪得屯門班收租客近排成日出手，搞到200萬以下啲盤絕晒迹咁濟。

大角咀居屋王海富苑最近有迷你單位，實用呎租高逾40元（資料圖片）

近期部分公、居屋租務成交個案

代理老友同劉Sir講，上述海富苑中層迷你單位，建築/實用面積約287/212方呎，由投資者喺舊年年中以238萬元買入，月租叫價曾經逾9,000元放租，最近終於以8,500元租出，建築/實用呎租約29.6/40.1元，呎租同奧運站啲私樓差唔多，租金回報率約4.3厘。

東頭邨月租近八千

富誠地產陳錫金話，黃大仙公屋東頭邨康東樓有個開放式單位，實用面積得277方呎，成交月租達7,800元，實用呎租約28.2元。其實細單位好租更好賣，同區私樓豪苑一個連平台單位，最近賣成395萬元，實用呎價約1.19萬元。

私樓方面，將軍澳天晉II依家收緊樓，相信都會成為區內租市嘅搶手貨。美聯蕭銳賢話，屋苑依家有約94個租盤，啱啱有個三房單位，以月租2.28萬元租出咗。

買樓收租回報穩陣，近排多番啲投資者入市。祥益袁思賢話，屯門市中心樓盤實用呎價企穩1萬元以上，好似屯門時代廣場A座高層6室，有收租客追價5萬元，終以335萬元買入，實用呎價逾1.06萬元。

錦華實呎逾萬破頂

此外，同區錦華花園A座高層8室，更以360萬元易手，實用呎價約1.02萬元，破晒紀錄。

中原酈偉倫話，屯門單幢樓麗寶大廈，一日有兩個單位都畀收租客買咗，全部貴過200萬元。其中有個中層F室賣210萬元，租金回報率至少3.7厘。

細價樓好賣，美聯梁仲維話，荃灣荃景花園9座低層G室，實用面積只得387方呎，都賣咗362萬元。市傳同區綠楊新邨K座中層單位賣585萬元，實用呎價貴過1萬元。