呢期藥股靜靜雞升番唔少，好似隻白雲山（00874），股價喺五月初低見21.25元後反覆回升，尋日急升5.3%至27.8元，即市一度升穿28蚊關口，睇番成交亦都配合，一旦股價升穿30蚊關，走勢將進一步轉強，阻力位30.6元，支持位25.3元，大家不妨跟進吓。

白雲山擁有7個中國馳名商標，除眾所皆知的「王老吉」外，最新加入的有「何濟公」、「潘高壽」及「天心」。睇番成績表，白雲山上半年收入增長一成至100億元人仔，純利增長14.7%至6.7億元人仔，期內銷售費用增加8.9%至21.5億元人仔，貿易業務毛利率跌0.02個百分點至7.27%，製造業務毛利率升1.64個百分點至43.9%。

近排白雲山有唔少利好消息，對手「加多寶」上月因為在重慶違反《不正當競爭法》，遭判決要向「王老吉」賠償40萬元人仔。另外，外界早前擔心新藥幾時先會帶來盈利貢獻，卒之尋日公司宣布「金戈」已經拎到生產批件，大摩仲出報告話白雲山股價有七至八成機會於未來六十日內上升，因為新藥預計可令每股增值5至15蚊。