由於見指數五月初以來從未連續四日收低於20日線，怕港股升勢轉弱甚至出現俯衝，前日將手上好倉平掉，點知平完昨日即挾，惟有嘆句︰「唔通真係連個天都唔鐘意我？」

恒指期貨走勢

過去三日，港股都唔多願意跟A股升，昨日好友一次過報晒仇，藉住幾隻重磅中資電訊及內銀股帶動，將淡友挾到失魂，恒指升568點，收25,317點，創海嘯後新高。

期指日市收25,315點，較合理值25,226點足足高水89點，除咗因為淡倉客冚倉外，亦反映基金經理在現貨買唔夠，惟有向期指市場入手。昨日現貨主板成交1,004億元，創七月三十日以來最高紀錄，絕對配合升市，即月期指日市成交增至7.26萬張，比前日多四成七。

昨日早市見恒指破20日線兼重上25,000點企穩唔回，小弟先買回一注好倉，可惜昨提出等跌定再買，無留低入市條件，經昨日一挾，恒指應以上次高位25,243點作為短期支持，進一步上試高位。昨期指成交密集區不是上晝出現，反而是下晝的25,250點上下25點子，短期會有支持，未有倉者不妨在這區域先補回好倉。