自○八年以來，中移（00941）第一次回復紅底股身份，加埋熱錢無嘢好炒，追落後之下，三大內銀股狂升2.7至4.5%，成功將恒指推番到兩萬五點樓上，淡友終於全軍覆沒。恒指昨日升568點，收25,318點，創海嘯後新高，成交過千億，基金在現貨市場買唔夠，期指都掃住先，令到九月期指日市升623點，收25,315點，扣番今個月的除息因素，實際高水89點之多。

中央支持潔淨能源大方向不變，燃氣股增長前景樂觀。（資料圖片）

太陽日誌

A股之前連升三日，港股唔多願跟，尋日滬綜指再升22點，收2,288點，何以能推動港股井噴式爆升？現貨收市後，外電報道話俄羅斯總統普京同烏克蘭總統波羅申科，就烏東達成永久停火協議，歐股開市無耐就因為消息而全線抽升，莫非春江鴨可以預知未來，定係呢個世界真係「蹺」成咁？

環球股市展升浪

今晚歐洲央行開會，利率期貨顯示得番0.15厘的歐元再融資利率，有機會再減到落0.05厘，美國啱啱先開始退市，那邊廂歐洲央行就開「行」水喉，近日荷蘭、挪威等西歐國家的兩年期國債，史無前例地跌到去負利率，債市預咗歐洲央行減息不特止，仲會在未來三至六個月推出更大規模的QE活動。

相反，睇番自今年三月十六日，烏克蘭克里米亞歸屬公投，結果係大多數當地居民想脫烏入俄，俄烏局勢急轉直下，到美國及歐盟先後宣布制裁俄羅斯，六月底至今，俄羅斯盧比貶值一成二，泛歐債券全升底下，俄債卻持續淨流出，十年債息由8.3厘升到上月初見9.9厘，俄股由六月底高位最多跌過一成二。如今俄烏停火，可見喺銀彈同飛彈之間，普京選擇了前者，亦消除咗歐洲經濟中短期內最大不明朗因素，睇怕新一輪的環球股市risk on，可能已經在尋日展開。

恒地繼續闖高位

收到十八份標書的尖沙咀中間道非工業用地，由恒地（00012）以46.88億元奪得，計及可建樓面33.97萬平方呎，呎價達1.38萬元，比市場預測上限仲要高近5%。新一輪由歐、日主導的水浸全球經濟形勢下，本地發展商對資產價格繼續向好的信心頗強。

昨日消息公布前，恒地股價已升6.1%，收報55元，成為升幅最大藍籌，現價市帳率0.73倍。筆者重申睇好本地地產股，亦都相信恒地返回約0.86倍的歷史市帳率，即係65元左右一啲都唔過份，而從技術走勢睇，下一站應該先挑戰60.5元。

早排基金狂質outperformer換貨，燃氣股業績再好都頂唔順，但近兩日所見，唔少低位已經有支持，話晒中央支持潔淨能源的大方向不變，管道燃氣銷售預期在未來五至十年，都會隨住滲透率提高而有穩定增長，現時幾隻基金追開的燃氣股，一四年PE落番去17至22倍之間，估值已經開始吸引。

因為八月中被中石化（00386）減持舊股，而令股價級級落的中燃（00384），尋日收14.44元，其實仲未去番減持價。有人辭官歸故里，有人漏夜趕科場，港交所（00388）股權披露資料顯示，一向被北控（00392）及南韓SK爭崩頭搶奪股權的中燃，獲北控在上月十四日接貨，當時在場內以每股均價14.8元，買入7,275萬股，持股量升至22.44%，進一步鞏固最大持股的地位。

睇番三月底止中燃業績其實幾好，多賺46%至25.76億元，大行估今年賺32至35億，計番中位數增長都有三成，PE20.7倍，股價近日在14元樓下搵到支持，買得過。