港股繼續轉向又轉向，但最終都係牛皮收市，恒指連續三日在10點之內埋單，可算是「超級牛皮」，俗語說「十個牛皮九個淡」，九月往績欠缺明朗方向，所以同賭大細無異。不過，昨日波幅多過前日，恒指半日受壓，最多跌176點，但其後A股帶動港股，午後曾倒升，收市微跌3點。

中移股價續創今年新高，距離「紅底股」已經不遠。（資料圖片）

太陽日誌

滬綜指升1.37%，創下15個月新高，滬深兩市成交金額合共3,678億元人民幣，亦創今年新高。咁大成交，升市唔使多講理由，淨係話資金流入已大條道理，流入原因亦好自然歸功於滬港通，內地傳媒列舉其他4個原因包括：新華社連續發文撐股市、打新資金回流股市、經濟數據弱將迫使央行減息或降準、習近平要求推進軍事創新利好軍工股，其實全部原因都相當虛幻，只係事後孔明，見個市升就搵一大堆理由。

AH折讓股發威

無可否認，自從滬港通宣布推出之後，A股立時轉勢，尤其一眾冇散戶吼之藍籌股如脫胎換骨。不過，推動A股上升的另一個原因是中國經濟數據轉好，PMI曾連升5個月，資金追捧落後之A股順理成章。

然而，七、八月經濟數據如接受「冰桶挑戰」般被一盆冰水照頭淋，傳聞八月份新增貸款亦未如預期，突然轉差的原因同七月打咗隻大老虎有關，原本諗住打貪會略為收手，點知八月更為落力，以投資者厭惡風險的性格，滬港通點勁法都難引起興趣入市，但翻玩「愈墮落愈快樂法則」（經濟數據愈差，愈有條件減息），就任佢點玩都得。

外資睇好中國股市根本毋須等待滬港通，QFII及RQFII額度仲有一半未用，而港股近日雖然沉悶，但據聞滬港通測試順利，券商股及AH折讓股乘勢發威，信達國際（00111）升8.3%，兩隻深圳同步上市股份山東墨龍（00568）和浙江世寶（01057）均升逾6%，咁快已炒埋深港通。

時變回紅底股

除滬港通主題之外，昨日最矚目的是iPhone 6概念，但不再是瑞聲（02018）及舜宇（02382）等手機設備股，而係內地三大電訊商，原因是預購反應踴躍，中移（00941）、聯通（00762）及中電信（00728）齊創五十二周新高，升幅由2至4%。中移已上到98蚊，距離「紅底股」不遠矣。睇番中移從低位累升逾五成，作為公用股，息率降到得3厘，同內銀股差得遠，「見紅」之日恐防亦隨時係見頂之時。

iPhone 6將於下周二亮相，據稱聯通4.7吋及5.5吋合約預定價分別為5,288元及6,288元人民幣，北京中移已有逾萬人預約，證明「果粉」引頸冀盼已久。iPhone 6未出先轟動，但佢舊「i雲」則引發荷里活女星裸照春光乍洩，網絡安全問題可能成為關注點。中國方面早前已禁止公務機構使用蘋果產品，原因就是安全問題，而有加密功能的一款酷派（02369）手機則被搶購一空。雖說限制僅限官方而非民間，但如果中美關係一旦轉差，蘋果產品隨時首當其衝，如早前的IBM和微軟產品命運相同。炒iPhone概念同炒滬港通概念一樣，事前好過事後，iPhone 4及iPhone 5早有樣辦。