Fundman睇市：瑞聲下半年見真章

正路數據好到咁，美國加息預期好難唔升溫，但見十年美債孳息在數據後彈唔上2.4厘樓上，尋日仲要隊落2.36厘，筆者估計，同近期俄烏及中東政治局勢不穩，以及預期歐央行好大機會再推QE，促使環球資金持續流入美債避險有關。姑勿論點，美息低企，對港股與港元資產價格應該利大於弊。

期指結算前夕，港股腳軟，恒指跌155點，報24,918點，兩萬五點關口又再失守，九月期指日市收24,868點，比指數除息後24,818點的合理價高50點。

基金股未見壓力

過去三日轉倉高峰期，九月期指枕住「高水」，從期指大戶手影反映，個市唔多似結算後玩完，不過基金經理揀股高度側重少數重磅股，整體大市成交又維持喺六、七百億水平，話少唔少話多唔多，經已夠玩死人。尋日N咁多公司派成績表，留意到部分基金股好似恒安（01044）、瑞聲（02018）及雅士利（01230），中期業績唔算好，但股價未見太大壓力，或者係反映市底唔錯的訊號。

恒地（00012）半年純利94.6億，升22%，撇除公允值變動的基礎盈利升46%，至50.3億元，比大行估計理想。尋日股價升4%，報53.5元，是○八年二月以來新高。

恒地借貸比率由去年底的17.2%，進一步降至13.6%，股東資金由2,234億升至2,297億，相當於每股76.5元，現價市帳率0.7倍，相比過去十年恒地市帳率介乎0.46至1.55倍之間，平均0.86倍。

恒地有力升多浸

本港樓價處於新高，而明年美息回升幅度估計又唔多下，現水平地產股其實仲係吸引，恒地就算回到歷史平均市帳率應該都唔過分。

主打手機聲學器件及天線系統的瑞聲科技，上半年賺9.8億元（人民幣．下同），跌8.8%，期內總收入跌3%，至37.16億元，毛利率由去年同期的42.79%收窄到41.17%，公司解釋是客戶產品組合變動影響，加上因上半年人民幣一度貶值而錄得匯兌虧損103萬。

雖然業績倒退，不過第二季毛利率已由首季的40.2%低位有所回升，再者，大家都預備瑞聲的搵真銀期會係下半年，即蘋果新一代iPhone落單之時，可能是第三季中後至第四季，估計全年賺25.5億元，市盈率約18.3倍，而好大可能在短期內曝光的iPhone，其銷售表現對瑞聲股價後市走勢至為關鍵。