港股尋日上晝仲係牛牛皮皮，下晝就向下走，恒指失守25,000點關，料今日期指結算後波幅會擴大。

內地開放外資進入醫療服務市場，或能為康健開闢新財路。(資料圖片)

尋日焦點板塊之一乃新能源汽車股，消息指中央擬設千億基金建設電動車充電網絡。由政府提供融資建設電動車充電設施，在整體規劃及標準制訂方面都有好處，有助大大加快電動車普及化。難怪尋日電動車股表現逆市走強，比亞迪（01211）股價曾高見54.25元，收報53.9元，升5.8%，高位與周初的失魂低價沽盤相差成十蚊，未瞓醒跟住掟貨真係冇眼睇！

中電信回試4元翻兜

業績股乃魚缸另一焦點，中海油服（02883）佳績獲大行唱好，股價急升8%。此外，中電信（00728）公布中績後股價曾高見4.52元，收報4.41元，升1.6%，成交4.03億元，主要係業績勝市場預期，半年純利114.36億元人仔，同比增長11.8%。期內，中電信的移動用戶雖淨減534萬戶，至用戶總量1.8億戶，但其中3G用戶淨增413萬戶，用戶佔比約六成，顯見其用戶結構進一步優化，有助帶動ARPU上升。

尋日其股價創五十二周新高，能否跑贏同業，除了視乎4G業務發展外，全面推進互聯網化轉型的進度亦屬關鍵。短線走勢，若受阻於4.5元，持貨者可先行走一轉，等回試4元邊再翻兜。

繼續睇吓不同產業的利好政策，尋日商務部聯同國家衞生計生委聯合發文推試點，允許境外投資者通過新設或併購方式在北京、天津、上海、江蘇、福建、廣東及海南設立外資獨資醫院。

其實，唔少富貴同胞因為對內地醫療服務水平欠信心而飛嚟香港醫病，近年香港大學都北上同深圳合辦醫院，若然未來港資能在內地辦獨資醫院，相信能增加吸引力。

嚟緊話唔定仲會有私醫集團謀在港上市，以便融資拓展內地業務。現成本地醫療股中，康健國際（03886）算係較具規模，雖然以現時估值未必太吸引，但勝在有香港品牌優勢，且近年積極擴張業務，最近便透過發行新股向卓悅（00653）收購纖體美容及保健中心業務，代價逾4億元，另入股醫療診斷及體檢公司Luck Key近一成股權，可謂動作多多。

近日公司公布中期純利4,515萬元，增長1.3倍。隨着香港業務基礎擴大，料可逐漸體現規模效益。此外，內地開放醫療服務市場，可以話係另一條大財路，相信未來兩年康健會透過併購，加快在內地的發展步伐，值得投資者關注。