美國經濟復甦令到好多外資基金熱錢湧入本港，直接帶動咗年初至今逾億元全幢工廈及商廈物業交投，至少錄得21宗成交，涉資共差唔多逾214億元；而且劉Sir仲發現大部分成交都喺六月份錄得，分別佔咗今年至今成交量同埋總值差唔多90%同97%。有代理就估計，下半年整體商廈呎價會升5至10%，整體工廈呎價亦會平穩發展。

福利集團旗下粉嶺安全街11號工廈，早前以約4.05億元沽出。

許偉國表示，首兩季本港受內地經濟放緩拖累，但第三季起，受惠海外資金湧港，帶旺市場氣氛。（資料圖片）

本年部分逾億元全幢工廈及商廈成交

根據土地註冊處及市場資料，今年頭八個月錄得9宗逾億元商廈成交，涉約164.73億元，追平咗去年同期成交宗數，成交金額就較去年同期上升約20.5%。

六月最旺 花旗入貨矚目

劉Sir發現，原來本年度所有成交都喺六月以後錄得，六月佔咗5宗，涉及約117.68億元。當中最矚目嘅成交係觀塘One Bay East東座全幢商廈樓花，花旗集團用咗約54.25億元購入全幢，呎價約10,596元。

另一方面，福利集團喺過去兩個月連續賣咗兩幢港島區商廈，包括咗灣仔中央廣場福利商業中心全幢同埋中環皇后大道中35號全幢商廈，成交價分別約11.05億元以及16億元。

喺工廈方面，今年頭八個月就錄得12宗逾億元成交，涉及約49.36億元，一樣追平咗上年同期成交宗數，成交金額就較去年同期下跌約9.78%，但係大部分工廈成交都係集中喺六月以後，佔10宗，涉資共43.21億元。

新界區工廈就最受市場關注，早前粉嶺勉勵龍中心全幢就以約5.15億元賣咗，呎價約3,371元，創咗新界區工廈呎價新高；同區由福利集團持有嘅安全街11號工廈，亦都以約4.05億元賣咗。

下半年商廈料漲價10%

韋堅信測量行許偉國話，頭兩季本港受到內地經濟放緩拖累，所以工商廈交投先咁淡靜。到咗第三季，受惠於美國經濟復甦，海外資金湧港，好似ARA基金、花旗等集團，另外福利集團、領匯（00823）等集團下決心沽出旗下物業，所以就直接帶旺咗市場氣氛。

許偉國又話，下半年商廈市場將會繼續受惠於美國經濟復甦，估計整體商廈呎價升5至10%；至於工廈方面，就要視乎活化工廈政策會唔會搞落下去，佢估計整體工廈呎價，都會平穩發展。