魚缸Blogger：利邦可炒復甦概念

尋日利邦（00891）以大成交急升7.3%，至2.48元，踩油收復250日線2.3元，短短兩個月，股價由一年低位1.64元爬番上嚟，追落後嘅力量實在唔能夠睇小，唔大貪睇住2.8元先。

利邦主要在內地、香港、澳門、台灣及歐洲從事高級至奢華男士服裝零售業務，亦在全球從事自家品牌授權業務。公司中期收入及純利分別倒退5.9%及47.3%，原因係內地經濟結構改變，同埋政府倡行節約。期內大中華區銷售佔比降至88.7%，大中華區店舖削減18間，內地同店銷售下跌6%。基於存貨可變現淨值變動，過季存貨可按高於成本價值出售，公司毛利率由75.4%升至79.3%。隨住盈利基數較低，利邦可炒復甦概念。

除此之外，摩通出報告叫人買，話佢已推出有效措施，七月錄得同店銷售增長，而且新任行政總裁上場，亦可改善公司前景，認為現時估值並未反映品牌組合，畀佢目標價3.1元，同現價差距25%。