人行收水，A股回吐近1%，港股跌幅相對細，恒指企在25,000點樓上，但見唔少早前熱炒的股份都有較大回吐，令人憂慮大戶在托住指數出貨。阿莊唔敢否定呢個可能性，都唔可以掉以輕心，宜密切留意A股走勢同香港資金進出情況。

雖然新西蘭原乳價回落，但內地上游乳業股業績未受影響。（資料圖片）

上周阿莊都提過擬調整組合，尋日以均價0.73元沽出首創環境（03989）及以24.05元沽出創科（00669）、又以均價8.11元減持20,000股滬杭甬（00576），再以均價2.42元買入10萬股香港中旅（00308）。

中策異動可留意

呢期魚缸炒風好似靜咗落嚟，疑似殼股炒作個案少咗，但尋日阿莊就留意咗隻中策集團（00235），呢隻股自未能成功收購台灣項目之後就冇咗焦點。今年首季曾以個多月時間由低位炒高一倍，但之後又回復平靜，過去三個月股價在0.17至0.22元水平上落。本月中旬公司宣布按每股0.16元配售新股集資約1.1億元。尋日股價逆市做好，高見0.213元，收報0.2元，升2%，成交2,859萬元。

目前中策主要業務係金屬貿易、銷售電子產品、放債同證券投資，冇單一大股東，但依首季股價可以在短時間炒上，推斷街貨都頗為歸邊。最近公司宣布中期業績虧轉盈，收入增長來自買賣金屬、而溢利主要來自已終止業務溢利及證券投資業務，但買賣金屬業務利潤好微，而金融資產公平值受市況波動影響，放債人業務收入僅700幾萬，真係冇咩亮點！

現時該股市值約7.39億元，市帳率約1倍。估計本來隻殼係班華資用來收購海外物業，依家有點像投閒置散，會係搵主好人家收場，抑或又有新收購目標，不得而知，只見股價呢期冇咩點炒過，最近又配股集資，有興趣研究股仔，亦可以關注一下。

奶粉股今年以來跌到一仆一碌，主要係來路嬰兒奶粉商減價，同埋新西蘭原乳拍賣價回落所致，不過內地上游乳業股卻似不受影響，原生態（01431）中期業績大升，現代牧業（01117）半年營業額及純利升86.2%及2.4倍，至25.85億及5.23億元人民幣，毛利率大升12.65個百分點至38.9%，加上產量上升，牛奶銷量46.4萬噸，較一年前升51.6%。

以大行估現牧全年賺8.47億計，半年已達標六成二，短期預測有上調可能，14.8倍PE，較歷史平均值20.4倍低兩成七，現水平中長線有一定吸引力。