樓市乜都有可能，特別係細價樓，全城最強九七蟹貨屋苑天水圍嘉湖山莊，當年排隊買樓喪炒。近日有頂層兩房單位被追價賣到約363萬元，雖仍未衝破九七巔位，但僅低約4%，實用呎價升穿八千元，為九七年後首見，報8,231元，創全屋苑近十七年新高；同類單位最新叫價380萬元，勢打破歷來紀錄。

全城最強蟹貨屋苑嘉湖山莊，近日有頂層兩房單位實用呎價破八千元，創九七年後新高。（資料圖片）

細單位高價成交個案

代理同劉Sir講，今次呢個嘉湖山莊美湖居3座連天台兩房單位，實用面積約441方呎，開價約360萬元。但近日以約363萬元賣咗，實用呎價約8,231元，呎價創咗九七年後全屋苑最高紀錄，比對上紀錄再升約8%。

牽晴實呎$9562新指標

劉Sir記得九七年同類連天台單位，最貴賣過378.3萬元，今次只低約4%，但比單位九七年購入價313萬元，升值約16%。依家同類兩房單位，叫價最貴已經去到380萬元。近排啲細單位，唔用新高價都買唔到。美聯周志強稱，粉嶺牽晴間11座高層A室，實用面積約388方呎，新買家話明睇好細價樓市場，即以約371萬元入市，實用呎價約9,562元創同類新高。

中原又話，大埔廣場4座中層A室都賣到394萬元，實用呎價8,312元，都創同類新高。

居屋亦錄得高價，富誠地產陳錫金話，慈雲山慈愛苑2期F座高層單位，自由市場賣成391萬元，實用呎價9,751元，創全屋苑兩房新高。

公屋景林邨275萬沽出

有人同劉Sir爆料，將軍澳公屋景林邨1座中層單位賣到275萬元。睇番資料，馬鞍山居屋福安花園貨車車位亦賣咗120萬元。

其實近排搶盤搶到癲。代理話，沙田第一城發生事故同層三房單位，因為係鎖匙盤即賣450萬元，實用呎價約9,978元。香港置業話，荔枝角清麗苑D座低層連租約盤，「無樓睇」賣345萬元，兩年幾升值逾53%。

樓價狂升，中原話，西灣河嘉亨灣今個月暫錄8宗買賣，平均實用呎價1.68萬元，一個月升10%，其中6座中層海景單位賣1,295萬元，實用呎價約1.73萬元。代理講，大角咀凱帆軒自製相連單位，賣到成1,398萬元，實用呎價逾1.52萬元。