上周恒指25,000點失而復得，高位現好淡爭持。雖然美國加息的聲音愈來愈大，但經濟數據等客觀條件仍有待配合，相信無礙下半年中、港股市「滬港通」呢個大主題。

目前主營原油碼頭服務業務的中石化冠德，具炒注資潛質。（資料圖片）

事實上，若然港股要有較大的調整，本月不乏藉口，偏偏市況維持大漲小回，可見市底偏強，淡友勢力未成氣候。本周為期指結算，展望九月仍然是穩中有升，建議重點關注國企及紅籌股，事關即使市況波幅擴大，在A股偏強以及國企改革等消息支持下，呢類股份仍不乏炒作題材。

東英金融可留意

自從兩地宣布落實推出滬港通以來，本地金融股，特別係中小型券商股，成為內地金融機構收購的對象。阿莊最近同一位細行老闆閒談，聽佢講當滬港通推出後，齋做本地客的細行將更加難搵食。難得有內地資金在港積極求殼，只要出得好價，真係會心動賣盤，免得蘇州過後無艇搭。講到金融股，本月中旬見東英金融（01140）股價異動，單日成交超過三千萬股，之後股價回落，現價差唔多去番急升前的水平，但明顯見到調整期間成交不多，會唔會有消息跟尾，不妨密切留意。

九月份市場另一個焦點，乃蘋果公司推出新iPhone產品。上周手機股表現唔錯，中績理想的中興通訊（00763）衝穿17元關，京信通信（02342）股價創五十二周新高。本來中移（00941）上月4G上客量理想，理論上氣氛亦利好酷派集團（02369），誰知近月股價一直跑輸大市及同業，上周五再跌7%，收報1.78元，似乎唔多對路，弱勢股落後總有原因，都係莫買當頭跌。

繼續睇番業績股，中石化冠德（00934）公布截至今年六月底止半年純利3.77億元，同比增長63%；期內經營溢利主要來自原油碼頭服務業務，以及應佔合資公司業績。去年底，中石化（00386）擬將榆濟線資產注入公司，據講前期工作正在積極進行中，且看年底前能否完成。

今年六月，曾有投資者按每股6.35元配售中石化冠德舊股，上周五該股受中績勝預期兼增派中期息刺激，股價升9%，收報6.69元。展望下半年，旗下倉儲、物流項目持續推進，加上母公司中石化資產重組消息多多，注資概念帶來支持，炒作條件不乏。走勢上，次季調整幅度比想像中深，跌至5.4元水平止跌始止跌，上周股價一連重上10日及50日線，且現金叉利好，若能成功扭轉年初以來降軌阻力，目標挑戰250日線7.3元，主要支持在6至6.2元水平。