中國移動（00941）及兩桶油急升後要抖氣，支撐大市重任落在地產股身上，不過佢哋對指數影響力始終較細，昨日大市雖然連升第四日，但恒指全日波幅僅得134點，收市升36點，報25,159點，主板成交703億元。

恆指期貨走勢2014/8/20

即月期指日市收報25,113點，較合理值低37點，亦與全日加權平均成交價25,117點十分接近，期指全日波幅唔大，僅135點。期指成交亦明顯縮減至3.49萬張，較前日足足少37%。昨日趁牛皮悶市，筆者按計劃在收市前「擺價」，在25,100點建首注好倉。

筆者今浪幸運地由兩萬四樓下，一直揸好倉贏近1,400點，因此對再建好倉，心理壓力當然有限，最多當贏少咗，但技術走勢上，只要恒指一日收於24,988點樓上，看官都不適宜盲目估頂，筆者會維持逢低試買的動作。

仲有六日，八月期指期權就會結算，未來幾日會否再有一兩日爆升的動作，逼淡友打靶投降，是今個月結算價可以有多高的關鍵。昨日沽空佔成交比例跌至9%，是近一個月以來最低，反映現貨市場淡友已完全靠邊站，挾淡倉的威力料會減低。