Fundman睇市：華晨貴得有道理

尋日港股都幾悶局，無咗中移（00941）及兩桶油炒落後，支撐大市繼續企住兩萬五樓上的重任，就落響地產股身上，恒隆地產（00101）、信置（00083）、九倉（00004）、恒地（00012）升2.1至3.3%。話就話指數再創○八年以來收市新高，收報25,159點，但整體大市上升股份690隻，少過705隻的下跌股份。

芬佬抱怨難搵食

尋日同班基金朋友傾開，以為近期大市浪接浪破頂，佢哋搵到真銀，點知情況啱啱相反，個個都話炒出炒入得個做字，一來今浪升的股票，大部分都係過去幾年under weight得好緊要的重磅大市值股份，其次今浪特色係市場「口味」轉得好快，唔少主動基金及對沖基金芬佬，都呻話今浪搵唔到食，畀老細詐型。

尋日吉利汽車（00175）派成績，表現一般，半年純利跌20.3%至11.13億元（人民幣．下同），面對內地自主品牌車市佔率流失，上半年業績唔得屬意料之內，半年銷售18.73萬輛，只及全年目標58萬輛的32%，高管接受現實，將全年銷量目標削四分之一去到43萬輛。

吉汽短線有睇頭

吉汽另一個打擊，是東歐的出口受到地緣政治不穩影響，上半年跌近32%，至3.44萬輛，令首六個月汽車銷售錄得29%跌幅，較內地整體自主品牌市場的15%銷量跌幅更大。

不過，買股票講未來唔係講歷史，吉汽有復甦故事，幾個主打車款，包括「新帝豪」、「GX9」、「GC9」及「KC」都在下半年推出，以全年銷售目標43萬，減番上半年18.73萬，意味公司下半年估會賣到24.27萬輛，比上半年多近三成。睇尋日收市前拗腰倒升，短期應該有睇頭。

另外想提一提隻華晨汽車（01114），一早知德國寶馬在華收入急升，預咗份成績表超靚，結果半年賺36.28億元，較去年大升78.7%。上半年華晨賣出14萬架寶馬，以現時設計年產能力30萬，大致可以感受到產品有幾渴市。華晨的賣點是一六年合營寶馬廠產能倍升至60萬，高管講明會引入寶馬2系、一款小型轎車及X3中國版，加上新晨（01148）開始供應國產N20寶馬引擎，有助降低成本。

德國血統的寶馬，在內地幾乎是銷量的保證，產能及內地部件比例又係半公開，華晨盈利增長可預測性其實頗高，過去估值一直比同業有溢價，好似一四年市盈率12.3倍，較吉汽及東風（00489）的8.5倍及8倍高近五成，但以37%的預期增長，PEG得0.33倍，貴得有道理。