港股升勢停不了，恒指在25,000點關前整固過後再度發力向上，收報25,122點，升167點。藍籌股中，表現最標青係隻潤地（01109），受業績遠勝預期兼增加派息消息刺激，股價飆升7%，收報18.18元。

中石化為下游業務引入民資一事，預期最快季內有分曉。（資料圖片）

券商預測中石化業績（人民幣）

中石化（00386）

阿莊100萬元投資組合

市場流傳，滬港通十月開車，阿爺已預備好以千億計的銀彈買國企股，兩地股市只有一個方向，就係「升」。身處呢啲政策市，真係唔使有咩大智慧，順勢而為即可。好似見到呢期港股連啲大弱勢的藍籌股都翻晒身，點講都唔係短炒一舖咁簡單。打從恒指升穿24,000點起，經已確認玩咗年幾的上落市已結束，大升市重臨，看官宜認清時勢，盡早布置好倉位。

聽卜架講，雖然近期升市，但唔見得有太多客戶贏大錢，皆因板塊炒作周期愈來愈短，加上近年長青的炒作板塊如濠賭同科網股都未復舊時勇，客戶轉身唔夠快，而藍籌股中，近日大升的係大小戶皆持倉不多的弱勢藍籌，如中移（00941），故能分享升浪的投資者唔太多。另外，亦有中資券商卜架話，暫未見有太多香港客戶查詢滬股通手續，到底「通車」過後係咪真係對卜架行業有幫助尚要觀察，最擔心係當兩地估值差價收窄之後，個主場去咗A股，到時港股如何自處，真係天曉得咁話！

講番個股，三桶油近日偏強，聽聞中石化（00386）為下游業務引入民資一事，騰訊（00700）及國壽（02628）都入圍複選名單，到底最終花落誰家，相信最快季內有分曉。上月底，中石化銷售與潤泰集團簽訂業務合作框架協議，雙方將便利店及電子商務等業務事宜進行合作，此舉有助增加中石化為下游業務引資的籌碼。

憧憬北水掃國企

中石化將於本周五宣布業績，券商估計其中期純利跌幅介乎1至12%，此因素大概已反映在股價上。若然中績表現與市場預測未有太大差落，股價可無後顧之憂。另一方面，若然下月真係有北水來掃國企，當然也不少得中石化呢隻重磅股的份兒！

走勢上，次季以來其股價反覆向上，50日線已成為主要支持，五月初其股價一度失守50日線，但不足一周時間便收復失地，繼續向上行，目前50日線處於7.4元水平，主要阻力位則仍在8元關。做定兩手準備，現水平先落小注，若中績前後又再下試50日線支持，睇位下第二注，一旦大成交突破8元關，可再加一注，中線目標反覆向8.8元推進。