魚缸Blogger：中外運航運未升夠

今個月波羅的海乾散貨運價指數回升，加上中績表現唔錯，中外運航運（00368）上周突破雙底頸線之後，股價仲未識停，尋日再升2.5%至2.46元，配合保力加通道擴闊，若可企穩250日線2.38元，下一個較大阻力位喺2.7元。

中航運從事乾散貨船期租及程租、集裝箱船期租、船務代理、船舶管理及融資租賃下的油輪光租業務，佢嘅母公司中國外運長航集團，係內地最大國際貨運代理公司，範圍涉及海陸空，具注資概念。好似上個月咁，中航運就完成收購咗母公司3間公司，以及同系中國外運（00598）4間公司，而未來亦可能仲有其他成熟業務注入。

睇番成績表，中航運上半年收益增長20.6%至1.12億美元，純利激增5倍至1,001.2萬美元，原因係佢加強船隊經營布局及優化船隊結構。另外，期內公司訂造一批環保節能乾散貨船、在建新船10艘，計埋現有50艘，預期年底自有船舶60艘，競爭力將提升。