尋日港股靠晒中移（00941）同中海油（00883）撐住，兩隻股票合共為恒指提供85點進帳，令恒指得以微升半點作結，確實得來不易。

重農行中績遜預期，令市場對內銀股的看法更趨悲觀。（資料圖片）

綜合券商預測重農行業績（人民幣）

太陽日誌

上星期恒指公司公布季度檢討結果，儘管恒指50隻成分股維持不變，但去滙控（00005）化的工作就繼續進行，表示會分階段把單一成分股佔指數比重上限，由15%降至10%。睇番藍籌中除滙控佔比逾14%之外，第二、三位的騰訊（00700）及中移均只佔指數權重低於一成，可見新措施明顯係衝着大笨象而來。

滙控沽壓料有限

周末睇到唔少分析，講到滙控今鋪實畀基金隊到開花，真係唔識嚇死，識就笑死。過去五年，滙控經歷有波幅無升幅的悶局，基本因素欠佳，管理層焦點去槓桿化、少做少錯的策略，大型基金對佢興趣唔大，股價大部分時間在60至90元之間浮沉，主動基金揸重貨的可能性微乎其微。況且不少主動基金，本身就有單一股票佔基金投資上限不高於一成的限制，因此實際來自主動基金的貨源斷估有限。

至於盈富基金（02800）一類被動基金，今次措施講明未來一年分五次進行，由14%降至10%，美銀美林計過，每1%變動，照單執藥的被動基金要減持1.3億美金，即係10.1億港紙咁上下，約莫只係平均一日成交額，有一季時間消化，淡友真係唯恐天下不亂。

今次恒指公司改例，仲包括以後可以將房地產信託基金納入成分股，睇番三隻本地最大市值的REITs，領匯（00823）、冠君（02778）及匯賢（87001），市值分別係1,041億港元、203億港元及176億人民幣，「晒士」拋離九條街的領匯，獲納入的機會是呼之欲出。但由於現時成分股五十隻名額已滿，意味領匯入去就有股份要被踢出。

恒指執位迎領匯

目前市值細過領匯的藍籌股包括華潤置地（01109）、利豐（00494）、新世界（00017）、信置（00083）、百麗（01880）、東亞（00023）、蒙牛（02319）同招商局國際（00144）。由於蒙牛、百麗同潤地都係近幾年至加入成分股行列，業務又無重大變化，斷估唔會咁快被踢走，正路睇招商局會係熱門，當然亦唔排除係地產換地產，將新世界或信置換走以騰出空位。

講番個市，查實中移業績到底有乜咁令人振奮，除估值夠平，基金經理under weight得太耐促使補倉潮之外，搵唔到更好理由去解釋。有趣是，同樣夠平的內銀股卻係無運行，好似重農行（03618）中期業績升11.6%，賺36億人仔，比市場預期低1至3%左右，但資產質素轉差情況持續，出嚟效果卻係完全兩個故事，股價跌6%，收報3.76元，返到八月初的起步位。

大行估重農行全年賺66億人仔左右，計落PE得4.1倍，但市場對不良貸款上升以及利率逐步市場化對下半年息差的影響，睇法仲係好悲觀。至於四大行業績，今日會由中行（03988）揭開序幕，大家不妨留意。