魚缸Blogger：廈門港務小注冷敲

事隔數月，市場對廈門港務（03378）資產重組方案憧憬重燃，加上公司發盈喜，刺激股價係咁破頂，上周五以全日高位1.53元收市，升逾半成，14日RSI處70，如果短線回吐仲守得住1.45元嘅話，不妨小注冷敲。

廈門港務主要從事國際及國內貿易集裝箱裝卸和儲存、散貨雜貨裝卸及儲存等，公司預期截至六月底止六個月淨利潤增長五成左右，原因係佢同廈門市土地發展中心若干土地收儲及資產收儲交易產生收益、整體營商環境改善，同埋港口貨物吞吐量上升。另旗下A股上市公司廈門港務發展，早前公布上半年營業額增長1.1倍至34.3億元人仔，純利微增1%至9,011萬元人仔，反映貿易持續復甦。

雖然五月母企廈門港務控股話過重組條件尚未成熟，三個月內都唔會再考慮相關事項，不過睇佢四月宣布有呢個初步安排到依家，幅圖仲係咁靚，無乜點調整過，相信重組只係時間問題！