今年初至依家，市場少咗舊樓強拍統一業權，獲土地審裁處批准強拍個案只有8宗，比起舊年大幅減少咗43%。不過，交易金額就由舊年同期近24億元，勁升38%去到今年超過33億元，反映到今年舊樓併購項目嘅規模比舊年大。

今年獲土地審裁處批准舊樓強拍個案，比去年大幅減少，但交易金額飆升。（資料圖片）

鰂魚涌吉祥大廈經過幾年時間，今年終於成功統一全部業權。（資料圖片）

今年暫錄的舊樓強拍數字

劉Sir知道，今年到依家獲土地審裁處批准做拍賣嘅舊樓項目只有8宗，全部都係以底價成交，講緊總成交金額約33億元。如果同舊年同期嘅14宗，同埋23.86億元比較，宗數雖然跌咗四成三，但係成交金額就倒升38%。

如果睇番今年嘅強拍個案，成交金額最大係上個星期強拍嘅鰂魚涌金馬大廈，由恒地（00012）喺無競爭對手下，以8.5億元投到。

吉祥大廈四宗涉9億

另外，同區吉祥大廈有成4宗申請個案喺今年「埋單」，而成個項目10宗個案經過幾年時間，終於成功統一晒全部業權，講緊成個地盤合共面積接近2.8萬方呎。講番吉祥大廈今年拍賣嘅4宗個案，全部係以拍賣底價售出，涉及金額總值超過9億元。至於舊年同期強拍成交金額最大嘅項目，係中半山堅道20號，賣咗逾7.3億元，相比之下，今年項目嘅規模同市值都高好多。

投地搶手 強拍轉靜

另外，今年土地審裁處收到9宗強拍申請個案，比起舊年同期嘅11宗，減少18%，涉及地盤面積加加埋埋有約9.6萬方呎；而舊年同期就超過10萬呎，地盤面積減少咗4%。其中今年新申請規模最大嘅項目，係紅磡馬頭圍大廈，講緊地盤面積約2.3萬方呎，測量師年初估計呢個地盤市值超過9.5億元。

第一太平戴維斯估價及專業服務董事總經理陳超國話，政府積極賣地，好多發展商都取易不取難，所以都預咗強拍宗數嘅申請會愈嚟愈少。

陳超國又話，加上辣招令發展商收購舊樓成本增加，小業主放售單位口價又企硬，咁樣只會令到舊樓重建步代拖慢，依家申請嘅個案，講緊都係幾年前購併嘅地盤，全新收購地盤已經好少聽到，長遠嚟講，對市區發展都唔係太好。