近幾年發展商真係愈嚟愈難做，既要面對建築成本上升，政府又有辣招稅分埋賣樓賺番嚟嘅利潤，再加上一手住宅條例要揼多成百萬做樓書。發展商裕泰興地產董事總經理羅守耀（Dennis）同劉Sir講，喺咁嘅低息環境下，覺得做「收租佬」好過，所以啱啱起好嘅九龍城住宅新盤滙豪，正式拎出市場招租，平均呎租40元。

裕泰興地產董事總經理羅守耀表示，最新落成的九龍城項目滙豪，23個住宅單位全部作收租用途。

滙豪

裕泰興Dennis話，九龍城聯合道50號嘅新盤改咗名叫做滙豪，係1層1伙設計，成幢樓有23個單位，實用面積614呎，針對1家4口有細路仔响鄰近九龍城或九龍塘區返學嘅家庭。項目上咗6伙嘅租金表，叫租由2.3萬到5.2萬元不等，估計一個月淨係住宅部分收到約60萬元。

物業待撤招後才放售

近呢幾年裕泰興有新樓起好都唔賣，Dennis解釋話，唔係為咗避一手新例想收租夠三年豁免做樓書，嗰度都係有限錢，反而係「辣招猛於虎」。因為如果發展商想賣樓，個單位市值1,500萬元，要畀嗰十幾個巴仙辣招稅，買家唔願意畀，但係如果想有成交，筆錢就要發展商畀，變相攤薄利潤。

今時今日發展商起幢新樓嘅利潤未必有10%，買賣雙方都唔願意承擔畀政府呢筆懲罰性稅款，所以佢哋公司寧願收租，既可維持物業嘅單一性，又可以收到3厘回報，等政府撤招後才部署放售。

港島項目建酒店商廈

另外，佢哋都啱啱租咗九龍太子道西都滙20個單位畀中國最大電訊設備供應商華為，講緊一個月租金收入約50萬元，而租客有權再增租單位。

同系西營盤高街嘅蔚峰99，25個單位都放緊租，平均每個單位月租2.85萬元。至於舊樓收購市場，裕泰興地產舊年都有3、4個地盤開咗齋，包括九龍城聯合道84至98號。另西營盤第三街同北角春秧街嘅項目，諗住起酒店或商廈。