隔晚美股雖然靠穩，但港股昨日未有跟隨做好，恒指低開85點之後，在重磅股騰訊（00700）、滙控（00005）及濠賭股下跌拖累下，跌幅擴大，恒指埋單跌196點，以24,387點收市，收於10日線之下，主板成交775億元。

聯想的全球個人電腦一哥地位漸趨穩固。（資料圖片）

大市經過早前的急升後，近日沽空再度活躍，反映淡友正在部署反擊行動，昨日大市正好就藉內地股市回落以及濠賭股有壞消息而調整。由於恒指已經跌穿10日線短期支持，有機會下試20日線24,067點，所以現階段毋須心急，若然大市調整，都唔憂無平貨買。

萬洲貨源歸邊

早前大市升，市場資金就湧晒去炒大價股，到大市表現唔精神，細價股再次蠢蠢欲動，之前熱炒的英發（00439），大市升嗰排，佢反而牛牛皮皮，股價於3.2至3.4元水平窄幅上落。到尋日大市跌，佢就發力升咗17%，以3.76元收市，距離高位3.85元差唔夠一毫子。不過，睇番呢隻股六月中由0.33元起步炒上，累積升幅超過十倍，升幅相當驚人，現水平真係要藝高人膽大先夠薑玩。

至於隻新股萬洲（00288），上市後走勢一直唔錯，尋日一度高見6.82元，但好快就掉頭向下，睇返呢個位，原來剛好較招股價高出一成，好多投資者往往以一成利潤為目標，在此水平沽貨，難怪尋日沽壓明顯增加。不過，公司已悉數行使超額配股權，反映機構投資者對萬洲前景有一定信心，而今次公開發售部分只有一成，換言之貨源都幾歸邊，相信收多一輪貨之後隨時發力，要突破7元關口應該只是時間問題。

大市早前上揚，聯想（00992）同樣被打入冷宮，股價在10.5元水平窄幅上落，但大市近兩個交易日下跌，聯想反而蠢蠢欲動，昨日再升1.1%，以10.96元收市，成交明顯增加。聯想今年第二季個人電腦（PC）的全球市佔率升至19.6%，已連續六季成為全球PC一哥，隨着全球PC市場回暖，加上地位漸趨穩固，料PC業務續可帶領其盈利上升。

至於聯想第二季智能手機出貨量在中國市場佔12%，全球佔5%，隨着國產手機冒起，相信聯想的智能手機亦可以受惠，估計業務仍有很大的增長空間。至於收購摩托羅拉手機業務，有望在年底前完成交易，目前正待各國政府處理。現時聯想的估值處於歷史平均水平，而股價經過整固後，睇格局隨時發力，可密切留意。