早幾個月二手豪宅市況仲相當呆滯，不過，睇番近兩個月可能受大市氣氛帶動，承接力都好番好多，所以唔少業主都把握機會出貨。好似產業署隔咗約兩年，再推出一批豪宅單位拍賣，將會喺今個月二十九日推出10個港島區豪宅拍賣，以開價計超過2.6億元。

愉富大廈有單位連車位，開價3880萬元拍賣。（資料圖片）

產業署今月推10個豪宅拍賣，薄扶林碧瑤灣佔五個。（資料圖片）

部分產業署月底推出拍賣的豪宅單位

美聯測量師行林子彬同劉Sir講，過去產業署都委託代理舉行過幾次拍賣會，今次推出嘅全部係港島區豪宅項目。

碧瑤佔半數 嗌低15%

其中薄扶林碧瑤灣佔最多有五個、大坑愉富大廈同北角慧雅閣分別佔兩個；而薄扶林碧林大廈就有一個。

如果以拍賣開價計，開價最低係慧雅閣A座地下A2室及一個車位，單位建築/實用面積約2,277/1,798方呎，連有約860方呎附屬面積，拍賣開價約1,880萬元，即建築/實用呎價約8,256/10,456元。

至於開價最高就係愉富大廈A座30字樓2號室及一個車位，建築/實用面積約2,028/1,570方呎，望維港海景，開價3,880萬元，建築/實用呎價約19,132/24,713元。劉Sir問過吓啲代理老友，佢哋話呢批單位開價約低市價一成至一成半。

海珀名邸2350萬蝕賣

產業署間唔中都會攞啲單位出嚟賣，對上一次同類拍賣會就係二○一二年九月，當日10個推出嘅港島豪宅項目全部賣出，涉及成交總值約2.887億元。

今年中該署亦都攞過5個單位出嚟招標，最終成功賣咗兩個碧瑤灣同1個跑馬地比華利山單位，成交價介乎近2,410萬至3,500萬元，部分比市值低約一成。

雖然話近期樓價升勢凌厲，但有部分仍未到家鄉嘅二手豪宅業主，都寧願趁機套現。中原陳繼成話，等咗接近兩年，東涌海珀名邸終於破冰，項目有一幢單號屋，實用面積2,355方呎，望園景及海景，近以2,350萬元交吉賣出，實用呎價9,979元，原業主一○年三月以2,496萬元買入，依家帳面蝕146萬元。

海珀名邸一向無咩放盤同成交，對上一宗成交已經係一二年十月，當時有間雙號屋以2,600萬元賣出。