上個禮拜流標嘅市區重建局觀塘市中心重建計劃第二及三發展區，市建局尋日已經極速重推。為咗減低再次流標風險以力保供應，劉Sir打探到今次部分細節作出讓步，畀多啲彈性予發展商，最大修訂係取消咗原定嘅80億元入場費，估計有機會降低底價，仲破例容許未被獲邀財團，加入獲邀發展商組成嘅財團，項目將喺今個月二十六日截標。

觀塘市中心重建計劃第二及三發展區範圍
市區重建局觀塘市中心重建計劃第二及三發展區項目昨再度招標。（資料圖片）

圖為市建局譚小瑩。

市建局觀塘市中心重建項目再招標

市建局公布，尋日已經邀請咗10家符合要求嘅發展商，按已修訂嘅招標條款入標競投上述觀塘重建項目，截標日期定喺本月二十六日，而市建局董事會將喺九月底前就項目嘅批標作出決定。

條款增彈性 底價或降

劉Sir收到風，今次招標條款會比上次有彈性得多，最主要修訂係取消咗80億元嘅入場費，估計底價都有機會調整。

另會回應發展商意見，項目平台嘅完工日期由五十六個月，延長至七十二個月，將來發展商想向城規會提出修訂項目總綱發展藍圖，市建局亦會提供協助。

唔單止咁，為咗增加財團以合資形式競投嘅彈性，今次仲破天荒容許獲邀發展商以外財團，加入10家獲邀發展商所組成的財團之內。意味萬科置業（香港）等被剔出財團仍有機會「敗者復活」，加入獲邀財團競投項目。

新地擬再投 長實研究

至於之前有份入標嘅發展商，部分都透露會再度競投，新地（00016）副董事總經理雷霆就同劉Sir講，該集團有興趣再次入標。

上次未有投標嘅長實（00001），集團執行董事趙國雄話，修訂條款合理，會再研究項目發展可行性。

劉Sir知道，部分發展條款維持不變，好似分紅依然由發展商提出，項目商業部分一樣要交還市建局。

項目住宅樓面約149.6萬方呎，提供約莫1,700伙，另設有約35.8萬方呎非住宅樓面，作為零售店舖、小販市集及公共交通交匯處等用途。

此外，地政總署公布，今季賣地計劃嘅大嶼山東涌第53a區酒店地，將會喺下月五日招標，截標日期十月十七日，地皮提供約莫61.36萬方呎樓面。

美聯測量師行林子彬估計，該幅大嶼山東涌酒店地皮估值約莫15.34億元。至於地皮市場嘅上限價就大約24.54億元，樓面呎價則大約4,000元左右。