魚缸Blogger：中國銀河上望7元

四月嗰陣，滬港通話要六個月時間籌備，市場預期最快十月出爐，尋日傳出港交所（00388）將於月底拉大隊預演，消息令到內地券商股中國銀河（06881）重上6蚊關，收報6.02元，升近半成，但係拍落去年招股價5.3元一比，實在升得唔多夠皮！

中國銀河去年收入增長四成至84.2億元（人民幣．下同），純利增長五成至21.3億元。期內證券經紀業務收入增長51.2%至61.7億元，反映市場鬥平佣對其影響不大，但因A股IPO暫停同債券市場低迷，投資銀行業務倒退41.1%至4.1億元，另資產管理業務及海外業務收入分別增長2.05倍及5.04倍，至1.3億元及2億元，全靠產品種類及數量大增，同埋旗下銀河國際控股開始收支平衡。

另外，近日公司發債申請獲得通過，涉及總規模不多於50億元，即係話會多咗現金去擴充業務，加上佢嘅零售業務佔比算重，相信可以受惠滬港通，短炒上望7蚊。