Fundman睇市：煤炭股不宜高追

滬港通仲有兩個幾月開通，儘管唔學似○七年港股直通車炒到32,000點咁瘋狂，但不時會炒吓AH折讓或者券商股。近期中資券商股最標青，第一上海（00227）幾日飆升五成，滬港通能夠帶旺多少生意是未知數，但幻想始終較美麗。

昨日另一焦點是滙豐控股（00005）收市後派成績表，結果比預期更差，但由於股價已預先連跌三日，在倫敦股價反而靠穩。大笨象呢兩年負面因素佔大多數，炒房收入大跌，又要面臨巨額罰款，惟有靠縮減人手支撐盈利，已非一隻增長股，雖然尚有高息支撐，但到80蚊樓下至好考慮炒上落。

萬洲國際（00288）公開發售超額54倍，但回撥只係增加到10%，即係街貨得2.56億股，市值約16億元，暗盤價升接近一成，同時帶動另兩隻小型豬肉股普甜（01699）同惠生（01340）上升。炒新股同半新股有時要講耐性而非質素，好似中國北車（06199）上市初期開慢車，但收乾貨之後兼配合大行唱好隨即脫胎換骨。

水泥股更有瞄頭

煤股都霉咗好耐，落後好似理所當然，而神華（01088）加價成催化劑。不過，內地PMI連升幾個月，加上係夏季用電高峰期，神華連續七次調低煤價之後，調高一次只能當作死貓彈。神華今次帶頭減產5,000萬噸、減銷6,000萬噸，同業相信會照跟，短期會對煤價帶來支持，但踏入淡季後可能又再跌過，長遠勢必有大批煤企要遭受淘汰。

昨日兗煤（01171）同中煤（01898）分別升5.6%及6.1%，由低位計已反彈三成，高追不宜，就算要買都寧願候低買神華，因其生產成本佔優。至於兗煤同中煤近期跑贏神華的原因相信亦同滬港通有關，前兩者A貴過H，兗煤仍然貴超過四成，相反神華H股較A股有溢價，結果市場睇折讓而非睇實力。

煤價回升，電力股亦高興？看似矛盾，但市場一直盛傳煤電聯動會再次啟動，即係電費將再次減價，上次減價是去年十月，換言之，今年又「好事近」。煤價低迷，水泥股亦受惠，碰上雲南大地震，水泥股及鋼鐵股又發國難財；當年四川大地震，水泥廠紛紛在當地增加產能，結果四川產能過剩，但如今中央嚴格限制，四大行業產能未來都封頂。

中央見出口同內需都冇起色，惟有走舊路靠投資刺激經濟，所以史提芬上個禮拜建議玩基建股固然走勢破頂，建材股亦欣然受惠。除咗地震之外，中央話再放水1萬億元人民幣做棚區改造，水泥股近期有多項利好因素支持，較買煤炭股更為划算。

信玻博財息兼收

指數持續高企，部分資金轉吼落後中資板塊，除咗水泥、煤炭呢同貴金屬外，玻璃股亦值得關注。見近日中國玻璃（03300）股價反覆向上，昨收報1.14元，乃去年八月以來的收市新高，股價已連升三個交易日，且成交逐步增加，可以睇實。

再睇另一隻玻璃股信義玻璃（00868），過去兩個月股價力守4.5元樓上，昨日股價由全日低位4.52元回升至全日高位4.61元收市，公司派發中期息每股9仙將於本周三除淨。若板塊氣氛持續升溫，信玻守穩4.5元之下有望出現反彈，可小注博財息兼收，向上較大阻力在50日線4.92元，掉頭失守4.5元則宜嚴守止蝕。