中國七月製造業PMI進一步升至51.7,比市場預期的51.4好,新訂單由六月52.8升至53.6,是一二年五月以來最高,出口訂單也從50.3升至50.8,反映第二季中央陸續推出的微刺激經濟政策,以及首季人民幣被貶值的效果,開始陸續浮現。

今年以來合生元股價累跌超過五成。(資料圖片)

太陽日誌

大行對合生元之預測(人民幣)

連升八日的港股,終於在周末前斷纜,受上周四晚歐美股市急跌拖累,恒指在周五回吐224點收報24,532點,主板成交798億元,較周四減少42億元。值得留意是,當晚歐美市場開始山泥傾瀉期間,金管局又再入市接貨,沽出23.25億港元應市,令到今日銀行體系結餘去到2,289.2億元水平,整個七月份一共注入677億元。

上周五所見,港匯企穩7.75強方兌換保證水平,可見跨國基金手上的籌碼,並無因成熟股市見頂而撤離中港市場。有理由相信,如果美股因退市預期進一步升溫而進入短期調整,一直在歐美等成熟市場搵食的資金,或有更大的誘因重臨亞洲,尤其估值低的中港市場。

趁跌分階段「濕平」

不得不提,上一次港股八連升,已經數番一二年十月,當時一樣係資金持續湧入港匯市場,7.75維持了近兩個月,同年恒指由18,056點,反覆升至一三年二月的23,944點,共升了5,888點。今年港匯在三月中在7.7684見底,慢慢轉強至近日的7.75水平,港股同期由21,137點低位拾級向上,到上周三見24,912點,累積升了3,775點,如果今浪升幅同上次睇齊,大市有可能見27,000點水平。

基於今次有滬港通故事配合,更有理由相信,今年高位應該未出現,如果大市短期整固,過去兩星期走雞的股民,反而應好好準備,趁跌市分階段「濕平」。

近期升市,資金高度集中揀選落後重磅股份,尤其年多時間無人問津的內銀、內險等股份,反而之前跑贏大市的基金股,完全跟唔到大市不特止,唔少仲慘變基金提款機。上周五有15隻股份股價創出今年新低,包括伯明翰環球(02309)、銀基(00886)及蠟筆小新食品(01262),貼市些少可能都知佢哋發生乜事。

白酒市場未見曙光

咁啱史提芬周六揸車聽到深圳電台一個類似團購殺價節目,52度五糧液叫到落百幾蚊人仔一支(乜牌子就聽唔到),不過,銀基早兩星期都話其代理的45度及68度五糧液供貨價再下調,返回一一年九月水平。內地反貪對白酒銷售影響仲未見到底,舊年銀基尚有8億存貨,會唔會繼續減值撥備?見上星期隊到落○九年上市以來新低,答案似乎呼之欲出。

奶粉股合生元(01112)亦創今年新低,滿以為五月初見45元已經差唔多,點知級級落形勢未改,上周五見過34.75元,之後拗腰反彈9.5%收38.8元,好似坐過山車一樣。有證券行出報告話達能集團(Danone)進行戰略評估,有可能收購合生元。

呢類併購有幾大機會成事,料同擲毫差唔多,但上半年新西蘭原乳拍賣價屢創新低,內地奶粉市場在外資掀起減價戰下,無論係上游定下游,似乎份中績都唔會好睇。睇雅士利(01230)連淡馬錫都要坐艇,可見大孖沙同散戶都避唔到中伏,合生元一四年PE落到17.6倍,唔算貴,審慎的不妨睇埋八月中份中績對唔對辦至算,若已上車,要留意停牌多時的澳優(01717)今日復牌,隨時累到街坊。